رەداكسيامىزعا شىعىس قازاقستان وبلىسى كۇرشىم اۋدانى اقجايلاۋ اۋىلىنىڭ تۇرعىنى جاقىپوۆا نازەركە حابارلاسىپ، كۇرشىم اۋدانىنىڭ اكىمشىلىك قىزمەتكەرلەرى قۇرمەت تاقتاسىن جاساۋ ءۇشىن تىل ارداگەرلەرىنىڭ ۇيلەرىنە كەلىپ، ولاردى سۋرەتكە تۇسىرگەنىن ول ءۇشىن 1000 تەڭگە كولەمىندە اقشا العانىن ايتتى. «مەن تىل ارداگەرى جاقىپ سەيىتقالي جۇماباي ۇلىنىڭ كەلىنى بولامىن. 9 مامىر قارساڭىندا كۇرشىم اۋدانى اكىمدىگىنىڭ قىزمەتكەرلەرى ۇيگە كەلىپ، قۇرمەت تاقتاسىنا تىل ارداگەرلەرىنىڭ فوتوسىن ىلەتىنىن، سول ءۇشىن اتامىزدى فوتوعا تۇسىرگىسى كەلەتىنىن ايتتى. سۋرەتكە تۇسىرگەنى ءۇشىن بىزدەن 1000 تەڭگە الدى. مەن اقشاعا بولا قىنجىلىپ وتىرعانىم جوق. تۇسىنبەيتىنىم، از عانا قالعان تىل ارداگەرلەرىنە قۇرمەت رەتىندە اكىمدىك نەگە اقشا بولمەيدى؟! ولاردان نەلىكتەن اقشا الادى؟ بىزگە عانا ەمەس كۇرشىم اۋدانىنداعى تىل ارداگەرى بار بىرنەشە ۇيدەن سولاي اقشا الدى عوي» دەپ ءوز رەنىشىن ءبىلدىردى جاقىپوۆا نازەركە.

وسىعان بايلانىستى كۇرشىم اۋدانىنىڭ اكىمدىگىنە حابارلاسىپ ءمان-جايدى بىلگەن ەدىك. كۇرشىم اۋدانىنىڭ ىشكى ساياسات ءبولىمىنىڭ باسشىسى قاسىمبايەۆا ارايلىم سەيىتحامزا قىزى تىل ارداگەرلەرىن فوتوعا تۇسىرمەگەنىن جانە سايكەسىنشە تۇرعىنداردان اقشا جيناماعانىن ايتتى. الايدا اقجايلاۋ اۋىلى مارقاكول اۋىلدىق وكرۋگىنە قاراستى بولعاندىقتان اتالمىش ءىستى سولار ۇيىمداستىرۋى مۇمكىن ەكەنىن جەتكىزدى. «9 مامىر جەڭىس كۇنىنە وراي كۇرشىم اۋدانى اكىمدىگى تىل ارداگەرلەرىنە ارناپ ءىس-شارا جاسادى. شاراعا 100 تىل ارداگەرى شاقىرتىلدى. الايدا ولاردى سۋرەتكە ءتۇسىرىپ جانە ول ءۇشىن اقشا جينالمادى» دەدى كۇرشىم اۋدانىنىڭ ىشكى ساياسات ءبولىمىنىڭ باسشىسى. قاسىمبايەۆا ارايلىم سەيىتحامزا قىزى كۇرشىم اۋدانى اقجايلاۋ اۋىلىنا قاراستى مارقاكول اۋىلدىق وكرۋگىنىڭ اكىمدىگىنە حابارلاسىپ، ءمان-جايدى انىقتايتىنىن ايتتى. مارقاكول اۋىلدىق وكرۋگى اكىمى اپپاراتىنىڭ جەتەكشى مامانى اراي بايمۋرزينا اكىمشىلىك اقشا جيناماعانىن جانە اكىمشىلىكتىڭ جوسپارىندا اتالمىش جۇمىس قاراستىرىلماعانىن جەتكىزگەن.

«مارقاكول اۋىلدىق وكرۋگى تىل ارداگەرلەرىنە ارناپ قۇرمەت تاقتاسىن جاساعان. وعان تىل ارداگەرلەرىنىڭ سۋرەتى ءىلىندى. ولاردى سۋرەتكە تۇسىرۋگە ارنايى فوتوگراف بارماعان جانە تىل ارداگەرلەرىنەن 1000 تەڭگە الماعان.جاقىپ سەيىتقالي جۇماباي ۇلىنىڭ سۋرەتىن كەلىنى جاقىپوۆا نازەركە الەۋمەتتىك جەلى ارقىلى اكىمشىلىك قىزمەتكەرلەرىنە جىبەردى» دەدى مارقاكول اۋىلدىق وكرۋگى اكىمى اپپاراتىنىڭ جەتەكشى مامانى اراي بايمۋرزينا. جاقىپوۆا نازەركە اكىمشىلىك قىزمەتكەرىمىز دەپ ۇيىنە كەلىپ، قىزمەتى ءۇشىن 1000 تەڭگە العان ادامداردىڭ ەسىمدەرىن سۇراماعانىن ايتادى. بۇل ىستە الاياقتار پايدا تابۋ ءۇشىن وسىنداي قۇيتىرقى ارەكەتكە بارۋى مۇمكىن دەگەن بولجام دا بار.

قامشىگەر: اقنۇر مۇحتارحان