امەريكالىق Delcotimes.com سايتىنىڭ ءجۋرناليسى دجەك ماككافەري Vesti.kz تىلشىسىنە بەرگەن سۇحباتىندا ءبىرىنشى ورتا سالماقتا WBO Intercontinental جانە WBA Fedelatin بەلبەۋلەرىنىڭ يەگەرى قازاقستاندىق كاسىپقوي بوكسشى قانات يسلامنىڭ مەكسيكالىق نوربەرتو گونسالەسپەن الداعى جەكپە-جەگىن تاعاتسىزدانا كۇتىپ جۇرگەنىن مالىمدەدى، دەپ حابارلايدى قامشى اقپاراتتىق اگەنتتىگى vesti.kz پورتالىنا سىلتەمە جاساپ.

«يسلامنان كەزەكتى اسەرلى نوكاۋت كۇتەمىن. ول وتە جاقسى بوكسشى، تالاپتى ءارى ادۋىندى. روي دجونستىڭ اندەركارتىندا مەن كورگەن جەكپە-جەگى وتە اسەرلى بولدى. يسلام - لايىقتى باعاسىن الا الماي جۇرگەن بوكسشى، ول ءوز ديۆيزيونىندا كوشباسشىلاردىڭ ءبىرى بولۋعا بارلىق مۇمكىندىگى بار. ول بەتكەۇستار بوكسشىلارمەن جۇدىرىقتاسۋعا لايىق دەپ ويلايمىن. ونىڭ دەمەتريۋس ەندرەدپەن نەمەسە دجاررەتت حەردپەن جۇدىرىقتاسۋى قىزىق بولار ەدى»، - دەدى دجەك ماككافەري.

ەسكە سالايىق، قانات يسلام كەلەسى جەكپە-جەگىن 26 مامىر كۇنى فلوريدا (اقش) قالاسىندا وتكىزەدى. وتانداسىمىزدىڭ قارسىلاسى مەكسيكالىق نوربەرتو گونسالەس بولادى. بۇل جەكپە-جەكتە ءبىرىنشى ورتا سالماقتاعى WBO NABA جانە WBA intercontinental بەلبەۋلەرى ساراپقا سالىنادى.