نيدەرلاندى كورولى ۆيللەم-الەكساندر 21 جىل بويى، ءتىپتى تاققا وتىرعاننان كەيىن دە ايىنا ەكى رەت KLM ەنشىلەس كومپانياسى KLM Cityhopper جولاۋشىلار رەيسىندە جاسىرىن تۇردە ەكىنشى ۇشقىش بولىپ جۇمىس جاساپ كەلگەندىگىن جۇرتشىلىققا جايىپ سالدى دەپ حابارلايدى قازاقپارات. 

باسىلىمنىڭ اتاپ وتۋىنشە، ۆيللەم-الەكساندردىڭ ۇشاق باسقارىپ كەلگەندىگى 2013 جىلى تاققا وتىرعانعا دەيىن ءمالىم بولعان ەدى. بۇرىن ول ۇشقىش ليسەنزياسىن ساقتاپ قالۋ ماقساتىندا شاعىن ورتاماگيسترالدى Fokker 70 ۇشاعىن «قوناق ۇشقىش» رەتىندە باسقارعان بولاتىن.

نيدەرلاندى كورولى ءوزىنىڭ بەرگەن سۇحباتىندا اتاپ وتكەندەي، ول ارى قاراي دا ۇشاقتىڭ شتۋرۆالىنا وتىرۋىن جالعاستىرماقشى جانە بيىل جازدا  ۇلكەن Boeing 737s لاينەرىن باسقارۋ بويىنشا ۇشۋ كۋرسىن وقىماق.

سونداي-اق، ول جولاۋشىلار ۇشاعىنىڭ شتۋرۆالىنا ءاربىر جاسىرىن وتىرىپ كەلگەن ساتىندە بورتتاعى جولاۋشىلارعا ءوزىنىڭ كىم ەكەنىن تانىستىرماي كەلگەن. سەبەبى، ەكىنشى ۇشقىش ءوزىن تانىستىرۋعا مىندەتتى ەمەس. بۇدان باسقا، ۆيللەم-الەكساندردىڭ ايتۋىنشا، KLM-نىڭ كيىم ۇلگىسى مەن فۋراجكاسىنان ونى ەشكىم تانىماعان.