قازاقستاننىڭ دۇنيەجۇزىلىك ساۋدا ۇيىمىنا جاقىن ۋاقىتتا مۇشە بولادى. بۇل تۋرالى بۇگىن پارلامەنت سەناتىنىڭ جالپى وتىرىسىندا ق ر ۇلتتىق ەكونوميكا ءمينيسترى ەربولات دوسايەۆ مالىمدەدى. قازاقپارات جازعانداي، قازىرگى تاڭدا قازاقستان دۇنيەجۇزىلىك ساۋدا ۇيىمىنا كىرۋ بارىسىنداعى كەلىسسوزدەردىڭ سوڭعى ساتىسىن جۇرگىزۋدە. سوعان ساي قازاقستاننىڭ قاتىستى تاراپتارمەن كوپجاقتى جانە ەكىجاقتى كەلىسسوزدەرى بەلسەندى ءجۇرىپ جاتىر.
«ەۋروپا وداعى جانە اقش-قا بايلانىستى ەكى نەگىزگى ماسەلە بار بولاتىن. سونىڭ ىشىندە ەۋروپا وداعى بويىنشا ماسەلەلەر شەشىلدى دەپ ايتۋعا بولادى. جاقىن ارالىقتا ەكىجاقتى كەلىسىمگە قول قوياتىن بولامىز. سونىمەن قاتار، كوپجاقتى ماسەلەلەر بويىنشا، سونىڭ ىشىندە اۋىل شارۋاشىلىعىن قولداۋعا قاتىستى سۇراقتار دا ءبىرجاقتى ىڭعايلانىپ قالدى دەۋگە بولادى»، - دەپ جاۋاپ بەرگەن دەپۋتاتتار سۇراعىنا مينيستر دوسايەۆ.
ونىڭ ايتۋىنشا، قازىرگى تاڭدا دسۇ-عا قوسىلعان رەسەي تاراپىنان ورىن العان كەدەرگىلەر ەڭسەرىلگەن. «وسىعان وراي، اعىمداعى جىلدىڭ سوڭىنا دەيىن كەلىسسوزدەر بەلسەندى تۇردە جۇرگىزىلسە، سونىڭ ناتيجەسى بويىنشا قازاقستاننىڭ دسۇ-عا ناقتى قاي ۋاقىتتا كىرەتىنى دە ايقىن بولادى»، - دەدى ەربولات دوسايەۆ.
قامشى-اقپارات
