جاستار تەاترى 2017 جىلدىڭ 21 مامىر كۇنى ج.سومجۇرەكتىڭ «تىلەپ-سارىقىز»   تراگەدياسىنىڭ  پرەمەراسىن وتكىزەدى. قويۋشى رەجيسسەر: قازاقستاننىڭ ەڭبەك سىڭىرگەن قايرەتكەرى نۇرقانات جاقىپباي

حVIII عاسىردىڭ ەكىنشى جارتىسىندا ءومىر سۇرگەن ايگىلى كۇيشى تىلەپ اسپانتاي ۇلى – قازاقتىڭ قوڭىر ءۇندى قوبىزىنىڭ قۇلاعىندا ويناعان تەڭدەسىز تالانتىمەن عانا ەمەس، اڭىزعا بەرگىسىز تالايلى تاعدىرىمەن دە ەل ەسىندە ەسىمى ەلەۋلى تۇلعا.

اتاقتى قويلىباي باقسىدان كۇي ۇيرەنىپ، تالانتىن شىڭداعان تىلەپتىڭ شىعارماشىلىعىنىڭ شارىقتاۋ شىڭى – تىكەلەي سارىقىز سۇلۋدىڭ ەسىمىمەن بايلانىستى. كيەلى قوبىز ءۇنى تابىستىرعان قوس عاشىقتىڭ ارماندا كەتكەن كەلتە باقىتى قانشالىقتى قاسىرەتتى بولسا، ءبىرىن-بىرى قۇلاي سۇيگەن كىرشىكسىز سەزىمى سونشالىقتى اياۋلى. كيەلى اسپاپتىڭ قوڭىر ۇنىنەن تامىر تارتار ولمەيتىن ماحاببات ءھام كەلەر ۇرپاق ۇلگى تۇتار تەكتىلىك – تىلەپتىڭ  سارىقىزعا ارناعان عاجايىپ كۇيى بولىپ، ورتامىزعا ورالىپ وتىر.

بۇگىندە استانانىڭ تورىندە قوبىزشىنىڭ ۇرپاعى، بەلگىلى ارحيتەكتور ساپار ىسقاق ۇلىنىڭ قولىمەنەن بوي كوتەرگەن ءسانى مەن سالتاناتى كەلىسكەن  «تىلەپ قوبىز» سارايى– تىلەپ پەن سارىقىز ماحابباتىنا قويىلعان ماڭگىلىك ەسكەرتكىش بەلگىسىندەي بولىپ، كەلەشەك ۇرپاقتىڭ بويىنا كيەلى قوبىزدىڭ تاعىلىمىن دارىتىپ،  جاستاردى شىنايى سەزىمگە تاربيەلەپ كەلەدى.