برازيليالىقتار ەل پرەزيدەنتى ميشەل تەمەردىڭ وتستاۆكاعا كەتۋىن تالاپ ەتىپ، جاپپاي ەرەۋىلگە شىقتى، دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساپ. 

نارازىلىق شەرۋى ەلدىڭ بىرنەشە ءىرى قالاسىندا وتكەن. اسىرەسە ريو-دە-جانەيرو مەن سان-پاۋلۋ ورتالىقتارىنا مىڭداعان ادام جينالدى. حالىقتىڭ باس كوتەرۋىنە 17ء-شى مامىر كۇنى جەرگىلىكتى كاسىپكەرلەر، اعايىندى جوەسلي مەن ۋەسلي باتيستالاردىڭ جوعارعى سوتقا تاپسىرعان ءۇنتاسپاسى سەبەپ بولعان.

وندا پرەزيدەنت ميشەل تەمەردىڭ كاسىپكەرلەرگە مۇناي كومپانيالارىنا قاتىستى قارجىلىق قۇيتىرقىلىقتاردى ەشكىمگە ءتىس جارماۋى ءۇشىن پارلامەنتتەگى كىشى پالاتانىڭ ءتوراعاسى ەدۋاردۋ كۋنەگە ءىرى سومادا پارا بەرۋىن سۇراعان ءساتى جازىلعان.
 وعان قوسا پوليسياعا پرەزيدەنتتىڭ جاقىن كەڭەسشىسىنىڭ ءبىرى  قىرۋار اقشانى چەمودانعا سالىپ جاتقانى جازىلعان بەينەجازبا تۇسكەن. وسىدان سوڭ وپپوزيسيا وكىلدەرى پارلامەنتتىڭ تومەنگى پالاتاسىنا پرەزيدەنتكە يمپيچمەنت جاريالاۋ تۋرالى ۇسىنىس جاسادى. وعان قوسا جوعارعى سوت تەمەردىڭ ۇستىنەن الاياقتىققا بارىپ، جەمقورلىققا جول بەردى دەگەن ايىپتار بويىنشا تەرگەۋ جونىندە شەشىم شىعارعان. الايدا پرەزيدەنت مۇنىڭ ءبارىن جوققا شىعارىپ وتىر.

شولۋشى : ايگەرىم تاۋباي