مەملەكەت باسشىسى ۇلىبريتانيا جانە سولتۇستىك يرلانديا بىرىككەن كورولدىگىنىڭ پرەمەر-مينيسترى تەرەزا مەيگە مانچەستەر قالاسىندا بولعان تەررورلىق اكتىگە بايلانىستى كوڭىل ايتۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.
جەدەلحاتتا «مانچەستەر ارەنا» ستاديونىنداعى جارىلىستار سالدارىنان كوپتەگەن ادامنىڭ قازا بولعانى تۋرالى حاباردى نۇرسۇلتان نازاربايەۆتىڭ زور كۇيزەلىسپەن قابىلداعانى ايتىلعان. بۇگىندە تەرروريزمنىڭ ەتەك الۋى بارلىق مەملەكەتتەر ءۇشىن ورتاق قاۋىپ-قاتەرگە اينالىپ وتىر. قازاقستان حالىقارالىق قاۋىپسىزدىككە قاتەر توندىرەتىن تەرروريزم مەن ەكسترەميزمنىڭ كەز كەلگەن ءتۇرىن قاتاڭ ايىپتايدى.
«بۇكىل ۇلىبريتانيا حالقىنا، قايعىلى وقيعا قۇرباندارىنىڭ وتباسىلارى مەن جاقىندارىنا قازاقستان حالقىنىڭ جانە جەكە ءوزىمنىڭ اتىمنان قايعىلارىنا ورتاقتاسىپ، كوڭىل ايتامىن. زارداپ شەككەندەردىڭ تەزىرەك ساۋىعىپ كەتۋىنە تىلەكتەسپىن»، - دەلىنگەن جەدەلحاتتا.
شولۋشى: گۇلىم جاقان
