ەلىمىزدىڭ مادەني استاناسىندا الماتى قالاسى جاستار ساياساتى ماسەلەلەرى جونىندەگى باسقارما قولداۋىمەن، الماتى جاستارىنىڭ كونگرەسى مەن  الماتى ستۋدەنتتەر اليانسىنىڭ ۇيىمداستىرۋىمەن، 14-25 جاس ارالىعىنداعى 300-گە جۋىق جاس  ونەردىڭ 17 تۇرىنەن ءوزارا ب ا ق سىناعان كولەمدى «الماتى قالاسى جاستارىنىڭ دەلفيي ويىندارى-2017» بايقاۋى اياقتالدى دەپ حابارلايدى قامشى اقپاراتتىق اگەنتتىگى. دەلفيي ويىندارى –قاتىسۋشىلار  اراسىنان تالانتتى تۇلعالار مەن ەرەكشە دارىندى جاستاردى ىرىكتەپ الۋعا باعىتتالعان، كلاسسيكادان باستاپ قازىرگى زامانعا دەيىنگى ونەردىڭ بارلىق ءتۇرىن بىرىكتىرەتىن كەشەندى بايقاۋ. وليمپيادا ويىندارىمەن بىرگە ەجەلگى گرەسيا جەرىندە دۇنيەگە كەلىپ، XX-عاسىردا قايتا جاندانا باستاعان دەلفيي ويىندارى بۇگىندە الەمنىڭ 100-گە تارتا مەملەكەتىندە قولداۋ تاپقان. قازاقستان ۇلتتىق دەلفيي ويىندارىن بيىل XIII-رەت وتكىزدى. ويىندار جاس تالانتتاردى تاۋىپ، ولاردى قولداۋ، وسكەلەڭ ۇرپاق اراسىندا مادەني مۇرانى ناسيحاتتاۋ، ولارعا رۋحاني، ەستەتيكالىق تاربيە بەرۋ، مادەنيەتارالىق ديالوگ پەن ۇلتتىق ونەردىڭ دامۋىنا ىقپال ەتۋدى كوزدەيدى.

بايقاۋدىڭ ناتيجەسى بويىنشا ەڭ ۇزدىك دەپ تانىلعان جەڭىمپازدار: «سكريپكا» نوميناسياسى بويىنشا – اقىنگەر ايلين (10-15 جاس) مەن بەكتۇروۆا ماليكا (16-21 جاس)، «كيىم ديزاينى» نوميناسياسىندا پەرنەبايەۆا گاۋھار، دومبىرا جانرى بويىنشا شاكەنبايەۆ مۇحامەدالى (10-15 جاس) مەن جۇلەكەن جاندوس (16-21 جاس)،  «ءداستۇرلى حالىق ءانى» اتالىمى بويىنشا ەرعالينا بالاۋسا، «فوتوسۋرەت» شەبەرلەرىنىڭ اراسىندا جاكايەۆا وفەليا ارنايى ماقتاۋ قاعازىمەن، باعالى سىيلىقتارمەن ماراپاتتالدى. قيمىلىنا كوز ىلەسپەس مىڭ بۇرالعان بيشىلەردىڭ اراسىنداعى باسەكەدە باس جۇلدەنى «زاماناۋي بي» نوميناسياسىندا «SAAD» بي توبى، «حالىق ءبيى» اتالىمىندا ءارتۇرلى جاس ەرەكشەلىكتەرىنە وراي، «سارمات» (10-15 جاس ارالىعى) پەن «نۇربي» (16-21 جاس) بي توپتارى قانجىعالارىنا بايلادى. ەندى اتالعان جەڭىمپازداردىڭ بارلىعى قالامىزدىڭ نامىسىن - رەسپۋبليكالىق ۇلتتىق دەلفيي ويىندارىندا قورعايتىن بولادى. ۇلتتىق دەلفيي ويىندارىندا جەڭىس تۇعىرىنان كورىنگەن جاستار حالىقارالىق دەلفيي ويىندارىندا ەلىمىزدىڭ اتىنان ونەر كورسەتەدى.