ق ر اقپارات جانە كوممۋنيكاسيالار ءمينيسترى داۋرەن ابايەۆتىڭ ويىنشا، مىندەتتى الەۋمەتتىك مەديسينالىق ساقتاندىرۋ جۇيەسىن ەنگىزۋ اياسىندا جىلدىڭ باسىندا بولعان قاربالاستار قايتالانباۋى ءتيىس. ول كەزدە مەكەنجاي بويىنشا ۋاقىتشا جانە تۇراقتى تىركەۋگە تۇرماعانى ءۇشىن جاۋاپكەرشىلىك كۇشەيتىلگەن بولاتىن. ال كەلەسى جىلدان باستاپ ءاربىر ادام ءوزىنىڭ مارتەبەسىن (جۇمىسى بار نەمەسە جۇمىسى جوق) انىقتاپ، تاعى ءبىر رەت تىركەۋگە تۇرۋى ءتيىس. سوعان قاراي مەديسينالىق ساقتاندىرۋ قورىنا ءتيىستى جارنالار تولەنەدى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

«ءبىز بارلىق شارالاردى ىسكە اسىرىپ جاتىرمىز. جىلدىڭ اياعىنا دەيىن ۇلگەرەمىز دەپ ويلايمىن. سوسىن ەل ازاماتتارى وزدەرى دە xالىققا قىزمەت كورسەتۋ ورتالىقتارىنا ەرتەرەك بارىپ، تىركەلۋى قاجەت. ويتكەنى ءقازىر بارىپ تىركەلمەسە، 2018 جىلى 1 قاڭتاردان باستاپ تاعى قاربالاس بولۋى ابدەن مۇمكىن. سوندىقتان بارلىقتارىڭىزدى جىلدىڭ اياعىنا دەيىن تىركەلۋىڭىزدى سۇرايمىز»، - دەدى ابايەۆ بۇگىن ۇكىمەت وتىرىسىنان كەيىن وتكەن باسپا ءسوز ءماسليxاتىندا.

ءمينيستردىڭ ايتۋىنشا، xالىققا قىزمەت كورسەتۋ ورتالىقتارىندا جۇمىس ىستەيتىن ماماندار بارلىعىن بىلەدى. سوندىقتان كەز كەلگەن ادامدى مارتەبەسىنە قاراي تىركەي الادى. ول ءۇشىن ءاربىر ازامات ءوزىنىڭ جەكە قۇجاتتارىن الىپ كەلسە بولعانى.

ايتا كەتەيىك، بۇگىنگى وتىرىستا ق ر پرەمەر-مينيسترى باقىتجان ساعىنتايەۆ مىندەتتى الەۋمەتتىك مەديسينالىق ساقتاندىرۋعا بايلانىستى xالىقتى مارتەبەسىنە قاراي تىركەۋ كەزىندە دۇربەلەڭگە جول بەرمەۋدى تاپسىردى.

«بۇل - وتە ماڭىزدى ماسەلە. حالىق قايتادان بارىپ، تىركەۋگە تۇرۋى ءتيىس. قىستا ازاماتتاردى تىركەۋ كەزىندە بولعان جاعداي قايتالانباۋى قاجەت. ۋاقىت بار. تاجىريبە دە جوق ەمەس. سوندىقتان اقپارات جانە كوممۋنيكاسيالار ءمينيسترى، سونداي-اق «ازاماتتار ءۇشىن ۇكىمەت» مەملەكەتتىك كورپوراسياسى قاربالاستارعا جول بەرمەۋى ءتيىس»، - دەپ اتاپ كورسەتتى ۇكىمەت باسشىسى.