ق ر قىلمىستىق كودەكسىنىڭ 21 بابىنا ازاماتتىقتان ايىرۋ تۇرىندەگى قوسىمشا قىلمىستىق جازا ەنگىزىلەدى. بۇل جايىندا بۇگىن ق ر پارلامەنتى ءماجىلىسىنىڭ جالپى وتىرىسىندا بەلگىلى بولدى، دەپ حابارلايدى قامشى اقپاراتتىق اگەنتتىگى قازاقپارات-قا سىلتەمە جاساپ.

وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ولاردى قازاقستان رەسپۋبليكاسى كونستيتۋسياسىنىڭ نورمالارىنا سايكەس كەلتىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» ق ر زاڭىنىڭ جوباسى جونىندە ادىلەت ءمينيسترى مارات بەكەتايەۆ بايانداما جاسادى.

ونىڭ ايتۋىنشا، ۇسىنىلىپ وتىرعان زاڭ جوباسىنىڭ ماقساتى  زاڭنامالىق اكتىلەردى كونستيتۋسياعا ەنگىزىلگەن تۇزەتۋلەرگە سايكەس كەلتىرۋ. جوبا پرەزيدەنتتىڭ جارلىعىن ىسكە اسىرۋ ماقساتىندا ازىرلەندى. كونستيتۋسياعا سايكەس كەلتىرۋ ءۇشىن 7 كودەكس پەن 46 زاڭعا وزگەرىستەر ەنگىزۋ قاجەت. «قىلمىستىق كودەكستىڭ 21 بابىنا ازاماتتىقتان ايىرۋ تۇرىندەگى قوسىمشا قىلمىستىق جازا ەنگىزۋ كوزدەلەدى. وسىلايشا، قىلمىستىق كودەكستىڭ 10 بابىندا كوزدەلگەن 14 اسا اۋىر تەرروريستىك قىلمىستار قۇرامى بويىنشا قوسىمشا جازا رەتىندە ازاماتتىقتان ايىرۋ ۇسىنىلىپ وتىر. مىسالى، تەرروريزم اكتىسى ءۇشىن، تەرروريستiك توپ قۇرۋ، وعان باسشىلىق ەتۋ جانە ونىڭ ارەكەتىنە قاتىسقانى ءۇشىن جانە تاعى باسقالارى»، - دەدى مينيستر.

بەكەتايەۆ «ۇلتتىق قاۋىپسىزدىك تۋرالى» زاڭعا سايكەس نەگىزگى ۇلتتىق مۇددەلەرگە كونستيتۋسيالىق قۇرىلىستىڭ تۇتاستىعى جاتاتىندىعىن اتاپ ءوتتى. بۇل ۇعىمعا ەلدىڭ تاۋەلسىزدىگى، بiرتۇتاستىعى جانە پرەزيدەنتتiك باسقارۋ نىسانى كىرەدى.  «قازاقستان رەسپۋبليكاسىنىڭ نەگىزگى ۇلتتىق جانە ومىرلىك ماڭىزى بار مۇددەلەرىنە اۋىر زيان تيگىزەتىن قىلمىستارعا 11 باپتا كوزدەلگەن 16 ءتۇرلى  قىلمىس قۇرامدارى كىردى. مىسالى، گەنوسيد، سەپاراتيستىك ارەكەت، ەكسترەميستىك توپ قۇرۋ، وعان باسشىلىق ەتۋ نەمەسە ونىڭ ارەكەتىنە قاتىسۋ جانە تاعى باسقالارى.

بۇل جازانى سوت ەرەكشە جاعدايلاردا جاسالعان ىس-ارەكەتتەردىڭ جانە اكەپ سوققان زارداپتىڭ اۋىرلىعىن، ءىستىڭ ناقتى ءمان-جايىن نەگىزگە الا وتىرىپ تاعايىندايدى. ازاماتتىقتان ايىرۋ سوتتىڭ زاڭدى كۇشىنە ەنگەن ايىپتاۋ ۇكىمى نەگىزىندە ۋاكىلەتتى ورگاندا تىركەۋگە جاتادى»، - دەدى ول.