بۇگىن قازاقتىڭ اتىن الەمگە ايگىلى ەتكەن ديماش قۇدايبەرگەننىڭ تۋعان كۇنى. بۇگىن ديماش  23 جاسقا تولدى. ونى الەمنىڭ تۇكپىر-تۇكپىرىندەگى جانكۇيەرلەرى قۇتتىقتاپ جاتىر دەپ حابارلايدى قامشى اقپاراتتىق اگەنتتىگى.

ەڭ الدىمەن باۋىر ەتى بالاسىن اتا-اناسى قۇتتىقتادى. 

«ديماش، سەن ومىرگە كەلگەن مامىراجاي مامىردىڭ شۋاقتى كۇنى، اتا-انامنىڭ «ۇلدى بولدىق!» دەپ شاتتانىپ، ۇلان-اسىر توي جاساعانى، قۋانىش ۇستىندە «بالاپانىم! 
اتا-انامنىڭ ءالديىسىڭ!
الىپ ۇشقان كوڭىلىمنىڭ ان-كۇيىسىڭ!
شات كۇلكىمەن ومىرگە ادىم باسا عوي!
باقىتىڭنىڭ شەكتەلمەسىن مولشەرى، جۇرەگىمنىڭ كىپ-كىشكەنتاي بولشەگى!» دەپ ءان ارناعانىم - كۇنى كەشەگىدەي كوز الدىمدا...
ءبارىمىزدىڭ ماحابباتىمىزعا بولەنىپ ءوستىڭ. اسىرەسە پاپامىز بەن مامامىزدىڭ وزىڭە دەگەن سەزىمى ەرەكشە بولاتىن! ءالى كۇنگە سولاي - توبەڭنەن قۇس ۇشىرمايدى! مامامىز باسىڭنان سيپاپ وتىرىپ «مەنىڭ قۇلىنىم بويى ۇزىن، ويى بيىك، ارمانى اسقاق، جۇرەگى جۇمساق، مەيىرىمدى ازامات بولىپ وسەدى» دەپ اينالىپ، تولعانۋشى ەدى. 
سەن اقىلدى ازامات بوپ ەرجەتتىڭ. 
ءومىر - بۇرالاڭدى سوقپاقتاردان، داڭعىل جولداردان، جابىسقاق باتپاقتاردان، ءمولدىر ايدىنداردان تۇراتىن كۇردەلى الەم.  ءار ادام ومىرگە ءوز تەرەزەسىنەن قارايدى. بىرەۋدىڭ تەرەزەسى كىرشىكسىز تازا - ول الەمنىڭ ءبارىن ادەمى ەتىپ كورەدى، ال ءبىر ادامدار اينالاعا جۋىلماعان كىر تەرەزەسىنەن قارايدى...
ومىردە قانداي ادامدى كەزىكتىرسەڭ دە بويىنان جاقسىلىق ىزدەۋگە تىرىس، قۋانىش سىيلاۋعا تىرىس! تەرەزەلەردىڭ تازارۋىنا كومەكتەس... بۇگىن تۋعان كۇنىڭ! وتباسىمىز ءۇشىن قۋانىشتى كۇن. ءومىرىڭ ءماندى دە ءساندى، عۇمىرىڭ ۇزاق، باقىتتى بولسىن، ديكونىم! اعاتايىڭ.»، دەپ اكەسى قانات ايتبايەۆ قۇتتىقتادى.

ديماشتىڭ اناسى سۆەتا ايتبايەۆا Instagram جەلىسىندە  «ديكونتايىم! تۋعان كۇنىڭ قۇتتى بولسىن! ەڭ باستىسى، امان ءجۇر، عۇمىرلى بول! ءبىزدىڭ وتباسىمىزدى، اعايىندى، دوس-جاراندى عانا قۋانتىپ دۇنيەگە كەلىپ ەدىڭ ، شۇكىر،بۇگىندە ءدۇيىم جۇرتتى ، بۇكىل ەلدى قۋانتىپ ءجۇرسىڭ . وسى بەتىڭنەن تايما! ءبىز ءۇشىن،ارتىڭنان ەرگەن قوس باۋىرىڭ ءۇشىن سەنىڭ ورنىڭ ەرەكشە.ءبىز سەنى جاقسى كورەمىز! ارمانشىل بالاپان ، بارلىق ارماندارىڭ ورىندالسىن!»، دەپ اق تىلەگىن جولدادى.

ديماشتى الەمگە ايگىلى ونەر ادامدارى دا قۇتتىقتاپ، اق تىلەكتەرىن ۆيدەو ارقىلى جەتكىزىپ جاتىر. 

ونىڭ ىشىندە ديماشتىڭ ونەرىنە ءتانتى بولىپ، تالانتىن مويىنداعان ايگىلى ءانشى لارا فابيان دا بار. ءانشى تىلەگىنىڭ سوڭىن «Happy birthday to you» انىمەن اياقتادى.

سونىمەن بىرگە امەريكالىق مودەل ەۆا لونگوريا الەۋمەتتىك جەلى ارقىلى ديماشقا  اق تىلەگىن بىلدىرگەن.

ەڭبەكتەگەن سابيدەن، ەڭكەيگەن قارتقا دەيىن ديماشتى قۇتتىقتاپ، اق تىلەكتەرىن بىلدىرگەن جانكۇيەرلەرى ديماشتىڭ 23 جاسقا تولۋىنا وراي 23 ەلدىڭ وكىلدەرى قۇتتىقتاۋ جولداعان ۆيدەوسى جاريالاندى.

13 جاستاعى كانادالىق قىز ديماشتىڭ سۋرەتىن سالىپ،  قازاق تىلىندە قۇتتىقتاۋ تىلەگىن بىلدىرگەن.

«سەن بىزگە اڭساعان ارمان اندەرىن سىيلادىڭ، ءبىز ساعان ۇمىتىلماس ەلەس سىيلادىق. ءبىز 960 شاقىرىم الىس ءوڭىردىڭ ءتورت بۇرىشىنان كەلىپ وتىرمىز. ءبىز قايناعان قالادان، سوناۋ  الىس جەردەگى قىستاقتان كەلدىك. ءبىراق ساعان جولىققان بارلىق وتكەن كۇندەر ۇمىتىلماس ەلەس بولىپ، ماڭگى ەسىمىزدە  ساقتالادى. «ۇمىتىلماس ەلەس» ءانى ديماشقا ارنالادى، سەن بىزگە قازاق ەلىنىڭ رومانتيكالىق ءومىرىن سەزىمدىردىڭ، ءبىز ساعان جۇڭگو ەلىنىڭ رومانتيكاسىن سەزىندىرە الساق دەيمىز» دەپ جۇرەك جاردى تىلەكتەرىن ءبىلدىردى ديماشتىڭ تىڭدارماندارى.

تاعىدا ايتا كەتەتىنى تانىمال ءانشى ديماشتىڭ  تۋعان كۇنىنە وراي، بۇگىن تۇنگى 00:00-گە دەيىن استانانىڭ بارلىق LED ەكراندارىندا تەك قانا ديماش تۋرالى بەينەروليكتەر كورسەتىلەدى.

«شەتەلدىك فاناتتارعا استاناداعى ەڭ كورنەكتى LED ەكراندارمەن كەلىسىم جاساۋعا قول ۇشىن سوزدىم. LED ەكرانداردى ءبىر كۇنگە جالعا الۋعا ءبىر ميلليون تەڭگەدەن استام قاراجات جۇمسالدى، شىعىننىڭ بارلىعىن ديماشتىڭ ونەرىن ەرەكشە باعالايتىن قىتايلىق «Guardians of Dimash» فاناتتار توبى وتەدى»، - دەيدى ەۇۋ-دىڭ ستۋدەنتى اقەدىل نۇربولات ۇلى.

دايىنداعان: اقنۇر مۇحتارحان