الەمدە بالالى بولا الماي جۇرگەندەر وتە كوپ. ءبىرى بالاعا زار بولسا، ەندى ءبىرى باۋىر ەتى بالاسىن دالاعا تاستاپ ءجۇر. ءسابيلى بولسام دەپ جاتسا دا، تۇرسا دا ارماندايتىنداردىڭ ءبىرى ارگەنتينالىق كلاۋديو كوككالون مەن ماريەلا رجەپەسكي. ول ارمانىنا جەتۋ ءۇشىن اۋرۋحانا تابالدىرىعىن توزدىردى. جاساندى ۇرىقتاندىرۋعا دا جۇگىنگىسى كەلدى. الايدا ول نۇسقا دا ءوز ناتيجەسىن بەرمەدى.وسىدان كەيىن ءۇمىتى ءۇزىلىپ، تاۋى شاعىلعان ماريەلا ۇزاق ۋاقىت كۇيزەلىستە بولدى. ايەلىنىڭ كۇننەن-كۇنگە ءسونىپ بارا جاتقانىن كورگەن كلاۋديو بالا اسىراپ الۋدى ۇسىندى. وسىدان كەيىن وتباسىلىق جۇپتىڭ ۇيىندە قايتا قۋانىش ۇشقىندارى پايدا بولدى.

الايدا بالا اسىراپ الۋ پروسەسسى ۇزاققا سوزىلدى. ون جىلدان كەيىن بالا اسىراپ الۋعا رۇقسات ەتىلدى دەگەن جاۋاپ كەلگەن. وتباسىلىق جۇپ جەتىمدەر ۇيىنە كەلگەندە 12 جاستاعى حۋليو ەسىمدى بالاعا بىردەن باۋىر باسىپ، جىلى تارتادى.

حۋليونىڭ ءتورت ءىنىسى مەن قارىنداستارى بار ەكەن. حۋليو ولارعا ءجيى بارىپ تۇردى. ولار دا قوناققا كەلىپ تۇرعان.

ءبىر كۇنى ونىڭ ءىنىسىن ۇلكەن بالالار سوققىعا جىعىپ، اۋرۋحاناعا تۇسكەنىن ەستىگەن حۋليو ءوزىن قويارعا جەر تاپپادى. كۇنى بويى جاقىندارىنىڭ قاسىندا بولىپ، تۇندە امالسىزدان ۇيگە قايتاتىن. حۋليونىڭ مۇڭايعان كوزىنەن ونىڭ ءىنى، قارىنداستارىنان جىراقتا ءومىر سۇرە المايتىنىن تۇسىنگەن ماريەلا مەن كلاۋديو ونىڭ ءىنى، قارىنداستارىن دا اسىراپ الۋعا بەل بۋادى. بۇل جاڭالىقتى ەستىگەندە حۋليو قۋانىشتان جىلاپ جىبەرگەن.  

ءقازىر ولار ءتاتۋ-تاتتى ءومىر ءسۇرىپ جاتىر. ماريەلا مەن كلاۋديونىڭ بەس بالاسى بار. ولار ۇيلەرىنە قۋانىش، باقىت كەلگەنىن جانە بۇرىن ۇنەمى قاڭىراپ بوس تۇراتىن، تىنىشتىق ورناعان ۇيلەرى بالانىڭ كۇلكىسى مەن ماحابباتقا تولعانىن ايتادى.

ماريەلانىڭ ءۇي شارۋاسىنا قولعابىس ەتەتىن كومەكشىلەرى پايدا بولعان، ال جىگىتتەر اكەسىنە كومەكتەسىپ، ايرانداي ۇيىعان وتباسىنا اينالعان. 

ماريەلان مەن كلاۋديو جاساندى تۇسىك جاسايتىن جانە تۋعان بالاسىن تاستاپ كەتەتىندەر ەشقاشان باقىتتى بولمايتىنىن ايتادى. سەبەبى دۇنيەگە كەلگەن بەيكۇنا ءسابيدىڭ كوز جاسى الدىنان شىعاتىنىن جەتكىزەدى. 

دايىنداعان: اسەم المۇحانبەت