ورتالىق كوممۋنيكاسيالار قىزمەتىندە «قازاقستان رەسپۋبليكاسى پرەزيدەنتىنىڭ ءارحيۆى سيفرلىك داۋىرگە قادام: جاڭا باعدار» تاقىرىبىندا باسپا ءسوز كونفەرەنسيا ءوتتى دەپ حابارلايدى قامشى اقپاراتتىق اگەنتتىگى قازاقستان رەسپۋبليكاسى پرەزيدەنتى ءارحيۆىنىڭ باسپا ءسوز قىزمەتىنە سىلتەمە جاساپ.

قازاقستان رەسپۋبليكاسى پرەزيدەنتىنىڭ ءارحيۆى وندىرىستىك قىزمەتىن تولىقتاي مودەرنيزاسيالاۋعا جانە ەلەكتروندى ارحيۆ قۇرۋعا كىرىستى.

شاراعا قازاقستان رەسپۋبليكاسى پرەزيدەنتى ءارحيۆىنىڭ ديرەكتورى، تەحنيكا عىلىمدارىنىڭ دوكتورى، پروفەسسور بوريس الىكەن ۇلى جاپاروۆ قاتىستى.

ونىڭ ايتۋىنشا، قازىرگى ۋاقىتتا ارحيۆتە اقپاراتتاندىرۋ كونسەپسياسى مەن باعدارلاماسى تولىق كەشەندە جۇزەگە اسىرىلۋدا، ۇلتتىق ارحيۆ قورى قۇجاتتارىن جاپپاي سيفرلەۋ جۇمىستارى جۇرگىزىلۋدە، زەرتتەۋشىلەر ءۇشىن «ۆيرتۋالدى وقۋ زالىنىڭ» اقپاراتتىق قۇرىلىمى مەن مودەلى قۇرىلعان.

زاماناۋي اقپاراتتىق تەحنولوگيالاردى ەنگىزۋ مەن ەلەكتروندى ارحيۆ قۇرۋ بويىنشا ارحيۆ تاراپىنان اتقارىلىپ جاتقان شارالاردىڭ دۇرىستىعى مەن ماقساتتىلىعىن زەرتتەۋشىلەر مەن ارحيۆشىلەردىڭ پىكىرلەرى دە ناقتىلاۋدا.

ءارحيۆتىڭ 2021 جىلعا دەيىنگى جوسپارىندا 1 كاتەگورياعا جاتاتىن ارحيۆ ىستەرىن ياعني، اسا قۇندى جانە زەرتتەۋشىلەر تاراپىنان سۇرانىسقا يە تاريحي قۇجاتتاردى سيفرلىك فورماتقا كوشىرۋ ماقساتى تۇر. وسىنداي ىستەردىڭ جالپى سانى 160 مىڭ. بيىلعى جىلدىڭ 1 قاڭتارداعى جاعداي بويىنشا 62 مىڭ ءىس سيفرلەنگەن.

ءارحيۆتىڭ بۇرىندارى قولدانىپ جۇرگەن اقپاراتتىق جۇيەلەرى ءار ءتۇرلى كومپانيالارمەن ءار جىلدارى ءتۇرلى باعدارلامالىق پلاتفورمالاردى پايدالانا وتىرىپ جاسالۋى بيزنەس-پروسەسستەردىڭ ورىندالۋىندا قيىندىقتارعا الىپ كەلگەن ەدى. بارلىق بيزنەس-پروسەسستەردى ءتيىمدى اۆتوماتتاندىرۋ ماقساتىندا ارحيۆ 2014 جىلدان باستاپ جاڭا اقپاراتتاندىرۋ كونسەپسياسىن قابىلدادى. ونداعى باسىم باعىتتاردىڭ ءبىرى بولىپ ارحيۆ قىزمەتىنىڭ باستى باعىتتارى: جيناقتاۋ، ساقتاۋدى قامتاماسىز ەتۋ، پايدالانۋ جانە عىلىمي-انىقتامالىق اپپارات قۇرۋ قىزمەتتەرىن تولىقتاي قامتي كەلە، ەلەكتروندى ارحيۆ جۇيەسىن قۇرۋ بولىپ انىقتالدى.

ق ر پرەزيدەنتىنىڭ ءارحيۆى اقپاراتتىق تەحنولوگيالاردى كەڭىنەن قولدانا وتىرىپ، بىرنەشە عىلىمي-زەرتتەۋ جوبالارىن جۇزەگە اسىرادى. اعىمداعى جىلدىڭ 1 ماۋسىمىنداعى جاعداي بويىنشا ق ر پرەزيدەنتى ءارحيۆىنىڭ http://archive.president.kz  سايتىنا قازاقستاننىڭ جاڭا زامان تاريحىنىڭ ماڭىزدى تاريحي وقيعالارىن سيپاتتايتىن 33 ۆيرتۋالدى تاريحي-قۇجاتتىق كورمە ورنالاستىرىلعان. ولاردىڭ قاتارىندا قازاقستاندىقتاردىڭ 1941-1945 جج. ۇلى وتان سوعىسىنا قاتىسۋى، حالىقتاردى قازاقستانعا دەپورتاسيالاۋ تاريحى، 1920-1930 جج. قازاق ءالفاۆيتىن لاتىن الفاۆيتىنە كوشىرۋ جانە ت.ب. تاقىرىپتارداعى كورمەلەر بار. الەمنىڭ بارلىق زەرتتەۋشىلەرى ءۇشىن ۆيرتۋالدىق كورمەلەردە بىرەگەي ارحيۆ قۇجاتتارى ونلاين رەجيمىندە قولجەتىمدى. ق ر پرەزيدەنتى ءارحيۆىنىڭ مۇنداي قادامعا بارۋى ەلباسىنىڭ بەس ينستيتۋسيونالدى رەفورماسىنىڭ ««مەنىڭ ەلىم» ازاماتتىق بىرتەكتىلىكتى نىعايتۋ» 87 قادامىنا ساي كەلەدى.