قوستانايدا قازىردەن باستاپ جاڭا جىل اتريبۋتيكالارى ورناتىلا باستاعان.ءتۇرلى-تۇستى جارىقتارعا ورانعان ۇيشىكتەر مەن قار بەينەلەرى قالادا بۇگىننەن باستاپ بوي كوتەرۋدە. جاڭا جىلدىق بەزەندىرۋ جۇمىستارى 2 ايعا سوزىلادى ەكەن. ۇيىمداستىرۋشىلار قالادا ەكى شىرشا ورناتۋدا جوسپارلاۋدا. "جاڭا جىلعا ءالى ەكى اي بار دەگەنمەن، كوزدى اشىپ-جۇمعانشا ۋاقىت زىرلاپ ءوتىپ كەتەدى. سول سەبەپتى، ءبىزدىڭ كومپانيا قالانى بەزىندىرۋ جۇمىستارىن باياعىدا-اق باستاپ كەتكەن"، - دەپ مالىمدەگەن "يزداتەلسكيي دوم" ج ش س ديرەكتورىنىڭ ورىنباسارى سەرگەي كۋزنياكوۆ. بۇل تۋرالى Alau.kz سايتىنا سىلتەمە جاساپ، NUR.KZ حابارلايدى.
بۇدان بولەك، پاۆلودار قالاسىندا دا تۇرعىنداردىڭ جاڭا جىلدى قارسى الۋعا دايىندىعى تۋرالى ايتىلا باستاعان. ياعني، قالاداعى كافە-مەيرامحانالاردىڭ جاڭا جىلدىق كەشتەردى وتكىزۋگە ارنالعان جارناماسى باستالعان.
ءماجىلىس دەپۋتاتى روزاقۇل حالمۇرادوۆ بولسا، جەلتوقسان ايى باستالماي جاتىپ، ەلىمىزدىڭ بارلىق قالالارىندا جاڭا جىل مەرەكەسىنە كىرىسۋ "داستۇرگە" اينالعانىن، وسى ماقساتتا ميلليونداعان قاراجات شىعىندالاتىنىن سىناعان بولاتىن. "ەگەر ءبىز ۇلت رەتىندە تاۋەلسىزدىگىمىزدى ءقادىر تۇتساق، ەڭ الدىمەن تاۋەلسىزدىك كۇنى مەن تۇڭعىش پرەزيدەنت كۇنى مەرەكەلەرىنە كوڭىل ءبولۋىمىز كەرەك. ءبىز جاڭا جىلدى تويلاۋعا، قالالاردى، ەلدى مەكەندەردى بەزەندىرۋگە، شىرشالاردى ورناتۋعا قارسى ەمەسپىز. ءبىراق، الدىمەن تۇڭعىش پرەزيدەنت كۇنى مەن تاۋەلسىزدىك كۇنىن مەرەكەلەگەننەن كەيىن جاڭا جىلدى قارسى الۋعا كىرىسسەك تە بولار ەدى عوي"، - دەگەن بولاتىن دەپۋتات.
قازاقستاننىڭ تاۋەلسىزدىك كۇنى مەرەكەسى ىلعي دا جاڭا جىل مەرەكەسىنىڭ كولەڭكەسىندە قالىپ قويادى. بۇل ماسەلە جىلدا كوتەرىلىپ جاتسا دا ازىرگە جاڭا-جىلعا كول-كوسىر شاشىلۋ مەن تاۋەلسىزدىكتى ۇمىت قالدىرۋ تيىلماي كەلەدى. تەك وڭتۇستىك قازاقستان وبلىسىنىڭ اكىمى اسقار مىرزاحمەتوۆ قانا جاڭا جىلدىق بەزەندىرۋلەردى تىم ەرتە باستاۋعا تىيىم سالىپ، تاۋەلسىزدىك مەرەكەسى تويلانعان سوڭ عانا شىرشالار ورناتىلادى دەگەن بولاتىن. ءبىز بارلىق وبلىستار اسقار مىرزاحمەتوۆتان ۇلگى السا ەكەن دەيمىز.
