وڭتۇستىك قازاقستان وبلىسىندا 13 جاستاعى مەكتەپ وقۋشىسى سۋعا باتىپ بارا جاتقان كىشكەنتاي ءبۇلدىرشىندى قۇتقارىپ قالدى، دەپ جازادى قامشى اقپاراتتىق اگەنتتىگ 24.kz-كە سىلتەمە جاساپ. 

دەمەجان التاي مۇزداي سۋعا تۇنشىققان ءبىر جاسار سابيگە العاشقى مەديسينالىق كومەك تە كورسەتكەن. جاساندى تىنىس الۋ ءادىسىن قولدانىپ، امان الىپ قالعان. باعىس اۋىلىنىڭ تۇرعىندارى دەمەجاننىڭ ەرلىگىنە ءدان ريزا.

ءاربىر ۇيدە مەكتەپ وقۋشىسىنىڭ ءبىر جارىم جاسار ەرجاندى قالاي قۇتقارعانى ايتىلىپ جاتىر. كىشكەنتاي ءبۇلدىرشىن ءبىر ساتكە اتا-انانىڭ قاداعالاۋىنسىز قالىپ، اعىنى قاتتى ارىق سۋىنا قۇلاپ كەتكەن. وقىس جاعداي وسى ارىقتىڭ بويىندا بولعان.

اۋىل تۇرعىندارىنىڭ ايتۋىنشا، تاۋ وزەنى بۇگىن ءقاۋىپسىز بوپ كورىنگەنىمەن، سول كۇنى تەرەڭدىگى ەكى مەتردەن اسىپ اعىپ جاتىپتى. وسى ماڭدا تۇراتىن مەكتەپ وقۋشىسى دەمەجان التاي ۇيىنەن كوشەگە شىققاندا كىشكەنتاي بالالاردىڭ كومەك سۇراپ، ايقايلاعان داۋىسىن ەستيدى. بىردە وزەنگە قاراي جۇگىرىپ، اعىپ بارا جاتقان كىشكەنتاي بالانى قۇتقارۋعا اسىعادى.

 دەمەجان التاي، باعىس اۋىلىنىڭ تۇرعىنى: – ەكى كىشكەنتاي بالا كەلدى دە ماعان ءىنىم سۋعا اعىپ كەتتى دەدى. مەن ءۇيدىڭ ارتىنا قاراي ءتۇستىم دە جان-جاعىما قارادىم. بالا كورىنبەدى. كەيىن سۋعا باتقان ءبار نارسە كورىندى. سۋعا ءتۇستىم دە بالانى قۇتقارىپ، سۋدىڭ جاعاسىنا شىعاردىم. بالا دەم الماي جاتتى. كوگەرىپ، جاۋراپ قالعان ەكەن.

جەتكىنشەك بالانى سۋدان الىپ شىعىپ قانا قويماي، وعان العاشقى مەديسينالىق كومەك كورسەتىپتى. جاساندى تىنىس الۋ ءادىسىن جاساعان. كەۋدە تۇسىنان باسىپ، دەم الۋىنا كومەكتەسكەن. قۇتقارۋشىلار ءدال بۇلاي ەرەسەك ادامداردىڭ ءوزى ىستەي الماس ەدى دەپ، دەمەجاننىڭ ەرلىگىنە ريزاشىلىقتارىن ءبىلدىردى.

عالىمجان قامباروۆ، سارىاعاش اۋداندىق توتەنشە جاعدايلار باسقارماسىنىڭ باسشىسى: – نەگىزىندە دەمەجان سول كۇنى جارىسقا كەتۋى كەرەك ەكەن. اعايىنا ءبىر سەبەپتەرمەن مەن جارىسقا بارا المايمىن دەگەن ەكەن. بۇل – جاراتقاننىڭ بەلگىسى. دەمەجان سول كۇنى جارىستان قالىپ، انا بالانىڭ ءومىرىن امان الىپ قالدى. قازىرگى ۋاقىتتا دەمەجاننىڭ باتىرلىعى ءۇشىن ءبىز ەندى دەپارتامەنتتىڭ باسشىلىعىنان ادامدى قۇتقارۋ توسبەلگىسىمەن ماراپاتتاۋ تۋرالى سۇرايمىز.

وسىلايشا كىشكەنتاي ەرجان قايتا ومىرگە كەلدى. قۋانىشىن جاسىرا الماعان انانىڭ ۇلىنا ءومىر ءسۇرۋ باقىتىن سىيلاعان كورشىسىنە ايتار العىسى شەكسىز.

جاڭىلاي قالتۇرسىنوۆا، باعىس اۋىلىنىڭ تۇرعىنى: – مەن قاتتى قورىقتىم. بالام ءبىر ءولىپ ءتىرىلدى. قالاي بولعانى ايتىپ جەتكىزە المايمىن. دەمەجانعا ۇلكەن راقمەتىمدى ايتامىن. بالامدى قۇتقارىپ قالعانى ءۇشىن اللا رازى بولسىن! ەندى 13 جاستاعى دەمەجان التاي ناعىز باتىرعا اينالدى. ونىڭ ەرلىگى جايىنداعى اڭىز-اڭگىمەلەر تۋعان اۋىلىنان الىسقا تاراپ كەتتى.

شولۋشى: ايگەرىم تاۋباي