بۇگىن اتىراۋ وبلىسى بويىنشا قازاقستان حالقى اسسامبلەياسىنىڭ 21 سەسسياسى ءوتتى. سەسسيادا ەلباسىنىڭ «بولاشاققا باعدار: رۋحاني جاڭعىرۋ» ماقالاسىندا باياندالعان مىندەتتەردى ىسكە اسىرۋعا اسسامبلەيانىڭ قاتىسۋىن ۇيىمداستىرۋ جانە مەملەكەت باسشىسىنىڭ قازاقستان حالقى اسسامبلەياسىنىڭ ححV سەسسياسىندا بەرگەن تاپسىرمالارىن ورىنداۋ ءسوز بولدى. جيىنعا اسسامبلەيا مۇشەلەرى، ەتنومادەني بىرلەستىكتەردىڭ باسشىلارى، وبلىستىق اسسامبلەيانىڭ عىلىمي-ساراپشىلىق توپتارى، قوعامدىق كەلىسىم جانە انالار كەڭەسىنىڭ مۇشەلەرى، وبلىستىق باسقارما جانە اۋدان باسشىلارى مەن جاستار قاتىستى.
شارانى وبلىسى اكىمى، اسسامبلەيانىڭ اتىراۋ وبلىسى بويىنشا ءتوراعاسى نۇرلان نوعايەۆ اشتى. ول ەلباسىنىڭ باعدارلامالىق ماقالاسىن ىسكە اسىرۋداعى بۇل ينستيتۋتتىڭ ءرولىنىڭ ەرەكشە ەكەنىن تىلگە تيەك ەتە وتىرىپ، الدا تۇرعان مىندەتتى ورىنداۋدا اتىراۋلىقتاردى ىقىلاسپەن ەڭبەك ەتۋگە شاقىردى.
“ۇلتىن ءسۇيىپ، ۇلت تاعدىرىن ءوز تاعدىرىمەن بايلانىستىراتىن ءاربىر ازامات بۇل مىندەتتەردى قۋانا قابىلداپ، ونىڭ اتقارىلۋىنا جۇمىلا كىرىسەدى دەگەن سەنىمدەمىز. الدىمىزدا اۋقىمدى مىندەتتەر تۇر: جاۋاپكەرشىلىك جوعارى، سۇرانىس تا سالماقتى بولماق”، – دەدى ول.
جيىندا باعدارلامانى ىسكە اسىرۋ ءۇشىن ءار باعىت بويىنشا جۇيەلى جۇمىستىڭ ءجۇرىپ جاتقانى ايتىلدى.
ماسەلەن، “تۋعان جەر” جوباسىن اتقارۋ ءۇشىن وبلىستا ساراپشىلار جانە جۇمىس توبى قۇرىلىپ، ونىڭ ناقتى جۇمىسقا كىرىسىپ كەتكەنى بەلگىلى بولدى. جوبا ايماقتاعى حالەل دوسمۇحامەدوۆ ۋنيۆەرسيتەتىنىڭ عىلىمي پوتەنسيالىنىڭ نەگىزىندە ىسكە اسپاق.
جوسپارلانعان شارالاردىڭ ىشىندە وبلىس مەكتەپتەرىندە فاكۋلتاتيۆتىك كۋرس رەتىندە «ولكەتانۋ» ءپانىنىڭ ەنگىزىلەتىنى، ايماقتىڭ مادەني ورىندارى مەن تاريحى تۋرالى كىتاپشالاردىڭ باسىلاتىنى، تاريحي ەسكەرتكىشتەردىڭ رەستاۆراسيالاناتىنى، قالانىڭ ينفراقۇرىلىمىن دامىتۋ باعىتىنداعى الەۋمەتتىك جوبالاردىڭ ءتىزىمى جاساقتالىپ، ءتۇرلى اكسيالار مەن مۇقتاج جاندارعا الەۋمەتتىك كومەكتىڭ بەرىلەتىنى، تۋريستىك كارتانىڭ جاساقتالاتىنى، وسى سياقتى باسقا دا باستامالاردىڭ جۇزەگە اساتىنى ايتىلدى.
ايماق باسشىسى بۇل مىندەتتى ىسكە اسىرۋدا، ازاماتتاردى تۋعان جەرىنە قامقورلىق تانىتۋعا ىنتالاندىرۋدا اسسامبلەيانىڭ ءرولى ەرەكشە دەدى.
بۇل تۇستا ماعاۋيا مەرعالييەۆ اتتى كاسىپكەردىڭ 800 ميلليون تەڭگە جۇمساپ تۋعان جەرى قۇلسارى قالاسىنا 165 ورىندىق بالاباقشا سالىپ بەرگەنى ۇلگى رەتىندە ايتىلدى.
جيىندا وبلىستاعى ەتنو-مادەني بىرلەستىك مۇشەلەرى مەن ايماقتىڭ دامۋىنا ەڭبەگى سىڭگەن كاسىپكەرلەر مەن جاۋاپتى قىزمەتكەرلەر سويلەپ، ۇسىنىس-پىكىرلەرىن ايتتى. بىرلىك پەن تۇراقتىلىقتى نىعايتۋعا، قازاقستاننىڭ الەۋمەتتىك-ەكونوميكالىق جانە قوعامدىق دامۋىنا زور ۇلەس قوسقان ءبىرقاتار ازاماتتار قازاقستان حالقى اسسامبلەياسىنىڭ جانە وبلىس اكىمىنىڭ العىس حاتتارىمەن ماراپاتتالدى.
سەسسيادان سوڭ جيىلعاندار اتىراۋ وبلىستىق قازاقستان حالقى اسسامبلەياسى ۇيىمداستىرعان كونسەرتتى تاماشالادى.
