1998 جىلى 10 ماۋسىمدا قازاقستان استاناسى استانا قالاسىنىڭ حالىقارالىق تۇساۋ كەسەرى وتكەن بولاتىن.  

1994 جىلى 6 شىلدەدە جوعارعى كەڭەس استانانى الماتىدان اقمولاعا اۋىستىرۋعا شەشىم قابىلداعان. استانا رەسمي تۇردە 1997 جىلى 10 جەلتوقساندا اقمولاعا اۋىستىرىلدى.

1998 جىل ەل استاناسى اتاۋىنىڭ وزگەرۋىمەن ەستە قالدى. 6 مامىردا نۇرسۇلتان نازاربايەۆ اقمولا قالاسىنىڭ اتىن استانا دەپ وزگەرتۋ تۋرالى جارلىققا قول قويدى. 20 مامىردا استانا قالاسىنىڭ ستاتۋسى بەكىتىلدى. ءسويتىپ، 10 ماۋسىمدا قازاقستاننىڭ جاڭا استاناسىنىڭ حالىقارالىق تۇساۋ كەسەرى ءوتتى.  

ءبىر جىلدان كەيىن استانا ءوزىنىڭ جىلدىق مەرەكەسىن تويلادى. 1999 جىلى 16 شىلدەدە يۋنەسكو باس حاتشىسى فەدەريكو مايور بوليۆيا استاناسى لا-پاسەدە استانانى «بەيبىتشىلىك قالاسى» كونكۋرسىنىڭ جەڭىمپازى دەپ جاريالاپ، مەدال ي سەرتيفيكات تاپسىردى. بۇل اتاق الەۋمەتتىك-ەكونوميكالىق، ساياسي جانە مادەني دامۋدا نەعۇرلىم قۋاتتى وسۋگە، تۇراقتى ۇلتارالىق قاتىناستى ورنىقتىرۋعا قول جەتكىزە العان، الەم مادەنيەتىنە ۇلەس قوسقان جاس قالالارعا بەرىلەدى. سودان باستاپ استانا «بەيبىتشىلىك قالاسى» اتالىپ كەلەدى.

10 ماۋسىم استانا كۇنى رەتىندە 2005 جىلعا دەيىن اتالىپ كەلدى. ال، 2006 جىلدان باستاپ استانا كۇنى رەتىندە استانانى اۋىستىرۋ تۋرالى شەشىم قابىلدانعان 6 شىلدە زاڭمەن بەكىتىلدى.