Astana EXPO-2017 باسشىلىعى قازاقستان كورمەگە قانشا قارجى جۇمساعانىن جاريالادى دەپ جازادى Qamshy.kz  Sputnik.kz اقپاراتىنا سىلتەمە جاساپ.

«Astana EXPO-2017» ۇلتتىق كومپانياسىنىڭ باسشىسى احمەتجان ەسىموۆ كورمەگە شامامەن قانشا قارجى جۇمسالعان جاريالاعان. الايدا ناقتى سومانى ايتپاعان.

«بۇل جوبا قانشاعا تۇسكەنىن ايتۋ ءالى ەرتە. ونى مىندەتتى تۇردە ايتامىز. ءبىراق بۇگىنگى كۇنى شامامەن 400 ميللياردتان استام قاراجات جۇمسالعانىن ايتا الامىز. بۇعان نىسانداردى قۇرىلىسى، ءىس-شارالار، ءبارى كىرەدى»، —  دەگەن ەسىموۆ باسپا ءسوز ءماسليحاتىندا. 

كورمەدە الەمنىڭ ۇزدىك تەحنولوگيالارى مەن تاجىريبەسى، بالامالى ەنەرگيا كوزدەرىن پايدالانۋ سالاسىنداعى جەتىستىكتەر پاش ەتىلەدى.  115 مەملەكەت، ونىڭ ىشىندە اقش، جۇڭگو، ۇلىبريتانيا، فرانسيا، گەرمانيا، رەسەي، جاپونيا، وڭتۇستىك كورەيا سەكىلدى ەلدەر بار، سونداي-اق 22 حالىقارالىق ۇيىم ەكسپو-2017 كورمەگە قاتىساتىنىن رەسمي تۇردە راستاعان.

ايتا كەتسەك، ەسىموۆ ءبىر سۇحباتىندا ەكسپو-عا باسشى بولىپ كەلگەندە قۇرىلىس الاڭىندا تەك بەتون پليتالارى عانا بولعانىن ايتقان ەدى. ەسىموۆ «ءبىز التى جىلدىڭ جۇمىستى 21 ايدا اتقارىپ تاستادىق»، — دەپ ماقتانعان.

وسى سۇحباتىندا «ءبىز ءتىپتى 300 ملرد تەڭگە ۇنەمدەدىك»، – دەگەن ەسىموۆ، ۇل قاراجاتتىڭ كۇن پانەلدەرىنىڭ سالىنباي قالعانىنىڭ ارقاسىندا ۇنەمدەلگەنىنە توقتالماعان ەدى.

احمەتجان ەسىموۆ «استانا ەكسپو-2017 ۇك» اق باسقارما ءتوراعاسى قىزمەتىنە 2015 جىلى 9 تامىزدا تاعايىندالعان بولاتىن.