استانا قالاسى «قازانات» يپپودرومى اۋماعىندا ات جارىسى ءوتىپ جاتىر دەپ حابارلايدى Qamshy.kz ءتىلشىسى.

جارىسقا ەلىمىزدىڭ 14 وبلىسى مەن استانا جانە الماتى قالالارىنان، رف، قىرعىزستان، وزبەكستان مەن پولشادان قاتىسۋشى شاباندوزدار كەلگەن.

ەكسپو-2017 كورمەسى اياسىندا قازاقستان رەسپۋبليكاسىنىڭ پرەزيدەنتى ن.ءا. نازاربايەۆتىڭ جۇلدەسىنە ات سپورتى تۇرلەرىنەن «ەكسپو كۋبوگى» ءوتىپ جاتىر. جارىس بارىسىندا جينالعاندار الامان بايگە، توپ بايگە، جورعا جارىسى، قۇنان بايگە سياقتى ۇلتتىق ونەر تۇرلەرىن تاماشالاۋدا. شارانىڭ ۇيىمداستىرۋشىلارى الماتى وبلىسىنىڭ اكىمدىگى، ق ر مادەنيەت جانە سپورت مينيسترلىگى، ق ر «ۇلتتىق سپورت تۇرلەرى قاۋىمداستىعى» مەن «قازاقستاننىڭ بايگە تۇرلەرى قوعامى» بولدى. جارىس جوعارى دەڭگەيدە وتكىزىلىپ وتىر. ات جارىسىن كورۋگە شامامەن بەس مىڭداي ادام جينالدى دەگەن اقپارات بار.

وسى ورايدان قامشى ءتىلشىسى ق ر مادەنيەت جانە سپورت مينيسترلىگى، سپورت جانە دەنە شىنىقتىرۋ ىستەرى كوميتەتىنىڭ ءتوراعاسى قاناعاتوۆ ەلسيار بايمۇحامەدۇلىن سوزگە تارتتى.

«ەكسپو-2017 كورمەسى اياسىندا 18 سپورتتىق جارىس وتەدى، سونىڭ ەڭ ماڭىزدىسى ەلباسىمىزدىڭ جۇلدەسىنە وتەتىن ات بايگەسى كۋبوگى. جارىس باعدارلاماسىندا الامان بايگە – 25 شاقىرىم، توپ بايگە – 15 شاقىرىم، جورعا اتتار جارىسى – 7 شاقىرىم، قۇنان بايگە – 7 شاقىرىم، 2400 جانە 1800 مەترگە ۇشقىر اتتار جارىسى (گلادكيە سكاچكي) وتەدى. ۇلتتىق ويىن تۇرلەرى الامان بايگە، توپ بايگە، جورعا اتتار جارىسى، قۇنان بايگە جوسپارلانعان.

جارىستىڭ ءۇزىلىس كەزىندە دجيگيتوۆكا، تەڭگە ءىلۋ، جامبى اتۋ، قىز قۋۋ سياقتى ۇلتتىق سپورت تۇرلەرىنەن كورسەتىلىمدەر ۇيىمداستىرىلادى.

ءاربىر وبلىستىڭ مادەني كۇندەرىندە 2 كۇن ۇلتتىق سپورت باعدارلامالارىن كورسەتەدى. كوكپاردان ءبىرىنشى رەت الەم چەمپيوناتى تامىز ايىندا وتكىزىلگەلى جاتىر. حالىقارالىق مامانداندىرىلعان ەكسپو-2017 كورمەسى اياسىندا قازاقستان رەسپۋبليكاسىنىڭ پرەزيدەنتى ن.ءا. نازاربايەۆتىڭ جۇلدەسىنە ات سپورتى تۇرلەرىنەن «ەكسپو كۋبوگى» وتەدى.  اۋدارىسپاقتان، جامبى اتۋدان حالىقارالىق جارىس وتەدى. سەنبى، جەكسەنبى كۇندەرى ەتنو اۋىلدان ۇلتتىق سپورت تۇرلەرى كورىنىستەرىن تاماشالاي الادى»، - دەدى قازانات» يپپودرومىنداعى قاربالاستىق تۋرالى قاناعاتوۆ.

 «قازانات» يپپودرومى اۋماعىنا ەسىگىن ايقارا اشقان «ەتنواۋىل» ۇلتتىق-مادەني كەشەنى ەرەكشە بولماق.

كەشەن ءارتۇرلى باعىتتاعى سەكتورلاردان تۇرادى. ولار كەلگەن قوناقتاردى ۇلتتىق قولونەرمەن، داستارقان مازىرىمەن سپورتتىق ويىندارىمەن، قازاق حالقىنىڭ سالت-داستۇرلەرىمەن تانىستىرادى.

بۇگىننەن باستاپ 10 قىركۇيەككە دەيىن «ەتنواۋىل» نون-ستوپ رەجيمىندە جۇمىس ىستەيدى. مۇندا ءتۇرلى فەستيۆالدار، كورمەلەر، ات سپورتى ويىندارى وتەدى.

سپورت جانە دەنە شىنىقتىرۋ كوميتەتى ءتوراعاسى ەلسيار بايمۇحامەد ۇلىنىڭ ايتۋىنشا، ۇشقىر اتتار جارىسى بويىنشا (2400 جانە 1800م) سىياقى قورى – 63ملن 600مىڭ تەڭگەنى (200 مىڭ دولل.) قۇرادى. ۇلتتىق جارىس تۇرلەرىنىڭ سىياقى مولشەرى – 36 ملن تەڭگە (115 مىڭ دولل.). سوما جۇلدەگەرلەر اراسىندا 5ء-شى ورىنعا دەيىن ءبولىنىپ بەرىلەدى. جەڭىمپازدار مەن جۇلدەگەرلەردى سالتاناتتى ماراپاتتاۋ جارىس اياقتالعان سوڭ جۇرگىزىلەدى.

ەرلان تولەۋباي