نيۋ-يوركتە تۇراتىن قازاق بالاسىنىڭ ۆيدەوسى جەلىدە كەڭىنەن تارالۋدا، دەپ حابارلايدى قامشى اقپاراتتىق اگەنتتىگى.  ديماش نيازوۆ نيۋ-يوركتە پوليسيا بولىپ قىزمەت اتقارادى.

ۆيدەودا ءوزىنىڭ قازاقستاندا تۋىپ، 8 سىنىپقا دەيىن شىمكەنت قالاسىندا اتا-اجەسىمەن تۇرعانىن ايتتى. اكەسى مەن اناسى جۇمىس بابىمەن شەت ەلگە كوشىپ كەتكەن. ارتىنشا ەس بىلگەن سوڭ، ديماش تا اتا-اناسىنىڭ جانىنا كەلەدى.

نيۋ-يوركتە تۇرىپ جاتقانىنا 13 جىل بولىپتى. اكەسى قۇرىلىس سالاسىندا قىزمەت ەتەدى جانە جەكە بوكسشىلاردى دايارلايتىن مەكتەبى بار. ديماش تا بوكسپەن شۇعىلدانادى. ءوزىنىڭ شىمكەنت قالاسىندا 6-7 جاسىنان باستاپ قاجىمۇقان ستاديونىنان بوكسپەن شۇعىلداناتىنىن ايتتى.

«بۇل قالاعا كەلگەن سوڭ قازاقستانداعى جەكە كۋالىگىمدى الىپ قويدى. سول cاتتە جۇرەگىمنىڭ ءبىر بولىگىن جۇلىپ بەرگەندەي بولدىم. مەن – قازاقپىن!» دەپ ءوزىنىڭ جۇرەك جاردى ويلارىمەن ءبولىستى.

ءوزىنىڭ كاسىپقوي بوكسشى ەكەنىن ايتىپ، كۇندەلىكتى دايىندىقتىڭ ناتيجەسىندە جەڭىستەرگە دەگەن سەنىمىن ءبىلدىردى. ءوزىنىڭ جەكە كومانداسى بار ەكەنىن دە تىلگە تيەك ەتتى.

ۆيدەودا وتانداستارىمىز گ.گولوۆكين مەن ق.يسلامنىڭ دا اتىن اتاپ ءوتىپ، سپورتتاعى جەتىستىكتەرىمەن تانىس ەكەنىن كورسەتتى. ءوزىنىڭ سپورت سالاسىندا اتالعان تۇلعالاردىڭ سوڭىنان كەلە جاتقانىن بايقاتتى.

دايىنداعان : ايگەرىم تاۋباي