2017 جىلدىڭ 9 ماۋسىمى قازاق ەلى ءۇشىن تاريحي ساتكە تولىقتى. قازاقستاندى وزگە قىرىنان تانىتاتىن، بار الەمگە ەلىمىزدى مويىنداتاتىن «ەكسپو-2017» حالىقارالىق كورمەسى استانا قالاسىندا ءدال وسى كۇنى اشىلدى. 2017 جىلدىڭ 10 ماۋسىمى مەن 10 قىركۇيەگى ارالىعىندا وتەتىن كورمەنىڭ باستى تاقىرىبى – «بولاشاق قۋاتى» («Future Energy»).
كورمەدە الەمنىڭ ۇزدىك تەحنولوگيالارى مەن تاجىريبەسى، بالامالى ەنەرگيا كوزدەرىن پايدالانۋ سالاسىنداعى جەتىستىكتەر پاش ەتىلەدى. كورمەنى تامشالاۋعا شەتەلدىك قوناقتاردىڭ سانىندا شەك جوق. 115 مەملەكەت، ونىڭ ىشىندە اقش، جۇڭگو، ۇلىبريتانيا، فرانسيا، گەرمانيا، رەسەي، جاپونيا، وڭتۇستىك كورەيا سەكىلدى ەلدەر بار، سونداي-اق 22 حالىقارالىق ۇيىم ەكسپو-2017 كورمەگە قاتىساتىنىن رەسمي تۇردە راستاعان.
شەتەلدىك قوناقتاردىڭ ماقساتى – وزگە ەلدە وتەتىن كورمەنىڭ ۇيىمداستىرىلۋ دارەجەسىن باعامداۋ. ولاردىڭ كورمەدە ءجۇرۋى قازاقستان ءۇشىن اسا قولداۋ تانىتا قويماس. ال ءوز ەلىمىزدىڭ ازاماتتارى ەلىمىزدە وتكەن كەز-كەلگەن ءىس-شاراعا اتسالىسىپ، قولداۋ تانىتىپ جاتسا، ەل ءۇشىن عانيبەت دەگەن سول ەمەس پە؟
سونداي ازاماتتىڭ ءبىرى جۇڭگو حالىق رەسپۋبليكاسىنىڭ تۋماسى، بۇگىندە وسكەمەن قالاسىنىڭ تۇرعىنى عالىمجان توقتار ۇلى. 29 جاستاعى قازاقستان ازاماتى كورمەگە اتسالىسۋ ماقساتىندا وسكەمەن قالاسىنان استاناعا دەيىن جۇگىرىپ جەتكەن.
«مەنىڭ باستى ماقساتىم – حالىقتى ەكسپو كورمەسىنە شاقىرۋ، كورمەنى جارنامالاۋ»، - دەدى ەر ازامات قامشى اقپاراتتىق اگەنتتىگىنىڭ تىلشىسىنە ايتقان سوزىندە.
عالىمجان توقتار ۇلىنىڭ ساپارى 26 ماۋسىمدا باستالعان، 9 ماۋسىم كۇنى قوياندى اۋىلىنا تاياپ، 10 ماۋىسمدا دىتتەگەن جەرىنە جەتكەن. 16 كۇنگى ساپارىندا كۇنىنە 80 شاقىرىم جولدى جۇگىرىپ وتكەن. كورمەگە اسا قىزىعۋشىلىق تانىتقان قازاق ازاماتىنا 1000 شاقىرىمنان استام ۇزاق ساپاردى وتكەرۋ وڭايعا سوقپاعانى ايدان انىق، ءبىراق كوزدەگەن ماقساتىن قالاي دا جۇزەگە اسىرعان ول بۇگىندە كوپكە ارمان بولعان كورمەنى ارالاپ ءجۇر.
وسكەمەن قالاسىنىڭ تۇرعىنى سول ايماقتا ءبىلىم الىپ، سول قالاداعى حالىققا قىزمەت كورسەتۋ ورتالىعىندا ينسپەكتور بولىپ قىزمەت اتقارعان، قازىرگى ۋاقىتتا جۇمىسسىز. الايدا جۇمىسسىز بولسا دا، ۋاقىتىن ءوز ماقساتىنا جەتۋ ءۇشىن پايدالانعان ەر ادام كورمەنى تاماشالاۋ ءۇشىن جولىنا كەتكەن قارجىنى ءوز قالتاسىنان شىعارعان.
ەرلان تولەۋباي
