كييەۆتەن استاناعا قولدان تىگىلگەن 30 مەترلىك ورامال اكەلىندى، دەپ جازادى قامشى اقپاراتتىق اگەنتتىگى. رەكوردتى ۇزىندىقتاعى ءشالىنى ماماندار ارنايى «ەكسپو» كەزىندە وتەتىن ۇلتتىق كۇن ءۇشىن دايىنداپتى. سونىمەن قاتار بۇل شاراعا ۋكراينالىق قوناقتاردىڭ العاشقى لەگى دە كەلە باستادى. بۇل تۋرالى 24.kz حابارلايدى.

ۋكراينادا الەمدەگى ەڭ ۇزىن ورامال جاسالدى. وعان 20 كەلى ءجىپ، 30 مەتر ماتا پايدالانىلعان. شەبەرلەر كەستەلى ورامالدى تىگۋگە ەكى اپتا ۋاقىت جۇمساعان. الايدا ولار ءوز تۋىندىلارىن رەكوردتار كىتابىنا ەنگىزىپ ۇلگەرگەن جوق. سەبەبى «ەكسپو-2017» كورمەسى اياسىندا وتەتىن ۋكراينا ۇلتتىق كۇندەرىندە ەڭ ۇزىن ويۋلى ماتانى جۇرتشىلىق نازارىنا ۇسىنۋعا اسىققان.

وكسانا ديكايا مەن ونىڭ ارىپتەستەرىنە 20 مەترلىك كەستەلى ورامالدى جاساۋ وڭايعا سوققان جوق. «ەكسپو-عا» ۇلگەرۋ ءۇشىن تىنىمسىز ەڭبەك ەتتى. اسىرەسە سيممەتريكالىق ويۋلارىن تىگۋ ءبىراز ۋاقىت العان.

وكسانا ديكايا، بوگدان حمەلنيسكيي فابريكاسىنىڭ شەبەرى:

- ءبىزدىڭ شەبەرلەر ۋاقىتپەن ساناسپاي جۇمىس ىستەدى. ولار ورامالدى بيىكتىكتەن كورىنەتىندەي اۋقىمدى جانە ءداستۇرلى بوياۋ – قىزىل، قارا تۇستەردىڭ قانىقتى بولۋىنا اسا ءمان بەردى.

استانادا وتەتىن «ەكسپو-2017-دە» ۋكراينالىقتار قولونەر تۋىندىلارىن عانا ەمەس، ۇلتتىق ونەرىن دە كوپشىلىك نازارىنا ۇسىنادى.

ۆلاديمير دجيدجورا، ۋكراينانىڭ قازاقستان رەسپۋبليكاسىنداعى ۋاقىتشا سەنىمدى وكىلى:

- «ەكسپو-2017» كورمەسىندە وتەتىن ءبىزدىڭ ۇلتتىق كۇنىمىز ەستەن كەتپەس ساتتەرگە تولى بولماق جانە قوناقتارعا كوتەرىڭكى كوڭىل-كۇي سىيلايمىز.

«ۇلتتىق كۇنگە قاتىسۋ ءار ۋكراينالىق ءۇشىن ۇلكەن قۇرمەت»، – دەيدى كاسىپكەرلىك كلۋبتىڭ باسشىسى تاتيانا ليۋلكا.

ۋكراينادان كەلگەن العاشقى دەلەگاسيانىڭ قۇرامى 15 ادامنان تۇرادى. جازعى ماۋسىمدا كەم دەگەندە تاعى ەكى توپتى «ەكسپو-عا» الىپ كەلۋدى ماقسات تۇتىپ وتىر.

تاتيانا ليۋلكا، Community جۋرنالىنىڭ شەف-رەداكتورى:

- بۇل كورمەنى تاماشالايتىن جۇرت كەلەسى 15-20 جىلدا بالامالى ەنەرگيا سالاسىن دامىتادى. بىر-بىرىمەن وسى سالاداعى جەتىستىكتەرمەن ءبولىسىپ، ينۆەستيسيا سالۋ مۇمكىندىكتەرىمەن تانىسۋعا ناعىز تاپتىرماس الاڭ.

الدىن الا ەسەپتەر بويىنشا، «ەكسپو-2017» كورمەسىنە ەكى مىڭنان استام ۋكراينالىق قوناققا كەلەدى. الايدا العاشقى دەلەگاسيا كەلىپ قايتقاننان كەيىن، ولاردىڭ قاتارى ەسەلەپ ارتۋى مۇمكىن.

شولۋشى: گۇلىم جاقان