ويتكەنى راس، ءوزىڭ دە جەلىدەسىڭ، 
ەركەلەرمەن ەسىرىپ ەرىگەسىڭ. 
بويداقپىن دەپ، جار ىزدەپ جۇرگەندەي ءبىر، 
بولسا دەيسىڭ جاس قىزدان كوڭىلدەسىڭ.

قاتىنىم سەزبەسىن دەپ ۇندەمەيسىڭ، 
قايدان كەلدىڭ، كىممەن دەپ،تەرمەمەيسىن. 
ءوز كىناڭدى جارىڭنان جاسىرام دەپ، 
جۇبايىڭدى تەكسەرىپ ۇلگەرمەيسىڭ.

الەۋمەتتىك جەلىلەر كوبەيۋدە، 
كۇننەن كۇنگە سان ءتۇرى كوركەيۋدە. 
جالاڭاشتىق جاhاندى جاۋلاپ الىپ، 
جاس ۇرپاقتىڭ ساناسىن يگەرۋدە.

جان دوسىڭنىڭ جارىنا كوز سالاسىڭ، 
نەتكەن سۇلۋ، كوركەم دەپ تامساناسىڭ. 
قۇداي قوسقان قوساعىڭ ۇمىت بولار، 
وزگە جاننىڭ قۇشاعىن اڭساعاسىن.

تاربيە ءتالىم الىپ وزگە ەلدەن، 
اۋرۋعا دا شالدىقتىق لەزدە كەلگەن. 
بالامىز عالامتوردا نە كورەدى دەپ، 
قارامايمىز، قورعاشتاپ ەرسى جەلدەن.

كوكەيدە ءبىر سۇراق بار جاۋابى جوق، 
كوبەيۋدە ەرلەرىم ساۋابى جوق. 
ساۋنا كەزگەن سەرىلەر كەسىرىنەن، 
جەتىمدەردىڭ كوز جاسى جاۋادى كوپ.

جاراسا ما، ايتۋعا جىگىت دەسەك، 
اڭدىعانى وسەك پەن، بولسا توسەك. 
ءبىر انانىڭ ورىمدەي جاس شىبىعىن، 
الداپ ارباپ، كوندىرسە كەۋدە توسەپ.

ەي، پەندە، قۇمارلىقتى قويمادىڭ با؟ 
ساۋىققا سايران سالار تويمادىڭ با؟ 
جاس قىزدىڭ ار نامىسىن قورلاعاندا، 
اناڭدى، قارىنداستى ويلادىڭ با؟

ۋا جاراتقان، ءتاڭىرىم، راببىم اللا، 
ءتانىمدى مۇگەدەك قىل، ءبارىن جالما. 
تەك قانا باسىمدى ءيىپ وتىنەرىم، 
جۇرەكتەن يمانىمدى سۋىرىپ الما.

بوزداسا كەۋدەمدەگى بوتا مۇڭىم،
قۇل بولعان قاجىتادى سوقا كۇنىم.
كەدەيلەردى قۋدالاپ باي شالقىساڭ،
ەشقاشان اپەرمەيدى وپا مۇنىڭ.
ايىنا 360 مىڭ دوللارلاپ،
ايلىق العان بەتسىزى جوعارىنىڭ.
بىرەۋى افريكادا اڭ اۋلاپ ءجۇر،
ورمانىن وتاپ بولىپ وتانىنىڭ.
باقششاسىنا برازيليانىڭ تالىن ەگەد،
اقشاسىنا اۋىلدىڭ شوپانىنىڭ.
بىرەۋى ءبىر اۋىلدىڭ جىل بيۋدجەتىن،
شاشادى شۋباسىنا توقالىنىڭ.
اپىر-اي بۇلار قاشان توقتاتادى؟
ەلىمنىڭ قازىناسىن قوپارۋىن.
وسىنداي وپاسىزداردى ويناقتاتىپ،
سەن قايدا قاراپ تۇرسىڭ، و ءتاڭىرىم؟!
جاساعان بولاشاققا جورىق دەپ پە ەم؟
ويىمدى وتەم بۇگىن ءبولىپ كوپپەن.
قازاقتىڭ تاريحىندا اقىندار كوپ،
ەلىنە ماڭداي تەرىن سەنىپ توككەن.
كەشەگى بۇقار جىراۋ دارا دانا،
ءار ءسوزىن ابىلايعا ەرىكتى ەتكەن.
بار جايدى بىلگەننەن سوڭ عانا بۇلاي،
ىرىسىن قازاعىمنىڭ تولىقتى ەتكەن.
ءاۋ باستان حانعا ايتىلعان شىندىق قانا،
باسشىنىڭ ءاربىر ءىسىن كورىكتى ەتكەن.
بۇگىنگى زيالىنىڭ ءتۇرىن كورسەڭ،
شەتىنەن ءوزىن ويلاپ شوگىپ كەتكەن.
باسشىلىق سۇراي قالسا بۇلك ەتپەستەن،
جاعدايى دەيدى جۇرتتىڭ وڭىپ كەتكەن.
اقىلى جەتكەنىمەن باتىلى جوق،
سالقىنى ساياساتتىڭ سوعىپ كەتكەن.
يمانى جۇرتتا قالعان اعالاردىڭ،
ميلارى مەتاللولوم بولىپ كەتكەن.
قازاقتىڭ از بولدى ما زور ۇلدارى؟
ۇققانعا شىن ۇلاعات سونىڭ ءبارى.
تولە بي، قازىبەكپەن ايتەكەلەر،
پارىزىن پاراساتپەن ورىنداداى.
كەسىپ ايتقان يماندىلىق ارقاسىندا،
تاريحتىڭ تۇر عوي انە تورىندە ءالى.
ال بۇگىنگى بي دەگەن دەپۋتات قوي،
ماعىناسىن ۇعىنسا ونىڭ داعى.
بۇرىنعىلار حالىققا جول كورسەتەتىن،
بۇگىنگىلەر تاپپاي ءجۇر ءوز جولىن دا ءالى.
بۇگىنگىلەر بي دە ەمەس ءبيشى دە ەمەس،
بيشىك بوپ تۇر بيلىكتىڭ قولىنداعى.

رينات زايتوۆ