رامازان ايىندا اقتوبەلىك كاسىپكەر شاميل كاسپرانوۆ بالالار ءۇيىنىڭ تاربيەلەنۋشىسى يرينا كۋدريناعا پاتەر سىيلادى، دەپ جازادى قامشى اقپاراتتىق اگەنتتىگى. جالعىزباستى انانىڭ ەندىگى ارمانى ەلدىڭ ءۇمىتىن اقتاپ، كاسىپكەردىڭ سەنىمىنە قاياۋ تۇسىرمەۋ. بۇل جايىندا قازاقپارات حابارلايدى.

يرينا كۋدرينا 5 جاسىندا «العا» بالالار ۇيىنە ءتۇسىپ، سول جەردە قازاق تىلىندە ءبىلىم العان. 1996 جىلى ەندى-ەندى ەس جيعان كىشكەنتاي قىز وزىمەن تاعدىرلاس بالالارمەن قاتار تاربيەلەندى، ءومىر ءۇشىن كۇرەستى. العاشىندا بالالار ءۇيى دەگەن اتاۋعا ۇيرەنىسىپ، وڭ-سولىن تانىدى. ول اتا-اناسى تۋرالى مۇلدە بىلمەيدى.

«بالالار ۇيىندە دايىندىق ساباعىنا باردىم. سول كەزدە مەنەن «قازاق ءتىلىندى وقىعىڭ كەلە مە؟» دەپ سۇرادى. ويلانباستان بىردەن كەلىسىمىمدى بەردىم. ءقازىر قازاق جانە ورىس تىلىندە ەركىن سويلەيمىن. مەكتەپتە، جوعارعى وقۋ ورنىندا قازاق تىلىندە ءبىلىم الدىم. «العا» بالالار ۇيىنەن سوڭ قۇدايبەرگەن جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ تاريح فاكۋلتەتىندە وقىدىم»،- دەدى يرينا كۋدرينا.

ول ءۇش جاستاعى بالاسىن جالعىز ءوزى تاربيەلەپ ءجۇر. جالعىزباستى انا 7 جىلدان بەرى پاتەر كەزەگىندە تۇرادى. قازىرگى ۋاقىتتا قالالىق تۇرعىن ءۇي سەكتورىندا 300 ادام بولىپ تۇر.

«العا» بالالار ءۇيىنىڭ ديرەكتورى كەنجەعازى بايعازينگە، جاسوسپىرىمدەر ءۇيىنىڭ ديرەكتورى جاننا دۇيسەنبيناعا العىس ايتامىن. ول ادامدار ءبىزدى تاربيەلەدى، قيىن كەزدە اقىل-كەڭەستەرىن بەردى، جانىمىزعا جۇبانىش بولدى. اقىلشىلارىمىز بولماعاندا ءبىز قايدا بارىپ، كىمنەن پانا سۇرار ەدىك؟ ءقازىر بالام ءۇش جاستا. ەندىگى ارمانىم ۇلىمدى ەل ازاماتى ەتىپ تاربيەلەپ، كاسىپكەردىڭ ءۇمىتىن اقتاۋ، جۇمىس ىستەۋ. كاسىپكەر شاميل كاسپرانوۆتى تانىمايتىن ەدىم. پاتەردى سىيعا بەرەتىن كۇنى بالالار ءۇيىنىڭ تاربيەلەنۋشىلەرىن تۇگەل شاقىرىپ، «مەيىرىم» الەۋمەتتىك ءۇيى اشىلدى. سول كەزدە مەنى اتىپ شاقىرىپ، كىلت بەرگەندە قۋانىشىمدا شەك بولمادى. ول جۇمىسقا الۋعا ۋادە بەردى. سول ادامنىڭ سەنىمىن اقتاپ، جاقسى جۇمىس ىستەۋگە ۋادە بەرەمىن»،- دەدى ي.كۋدرينا.

ايتا كەتەيىك، يرينا سوڭعى 7 جىلدان بەرى پاتەر جالداپ تۇرادى. جوعارعى وقۋ ورنىن بىتىرگەن سوڭ ول تاربيەشى، ساتۋشى بولىپ جۇمىس ىستەگەن. تۇراقتى تابىسى جوق جالعىزباستى انا ءوزىن جازعىرىپ، اۋىر سوزدەر ايتىپ، ومىرىنە كۇدىكپەن قارايتىنداردان كوڭىلى قالعان.

«مەن تۋرالى ءتۇرلى وي ايتىپ، پاتەر العانىم ءۇشىن جازعىرىپ، ۇرىسىپ جاتىر. ءبىراق ولار جەتىم بولۋدىڭ، اتا-اناسىز ءومىر ءسۇرۋدىڭ، ءار كۇنى كۇرەسۋدىڭ، مويىماي العا ۇمتىلۋدىڭ نە ەكەنىن بىلمەيتىن ادامدار دەپ ويلايمىن. مەنى ەشكىم كىنالاپ، جازعىرماسا ەكەن. شاميل كاسپرانوۆ ەكى ادامدى باسپانالى ەتتى. مەن جانە مەنىڭ بالام باقىتتىمىز»،- دەدى ول.

 قازاق ءتىلىن جەتىك مەڭگەرگەن يرينا كۋدرينا جەڭىل اتلەتيكامەن شۇعىلدانعان ەكەن. جاسوسپىرىمدەر ءۇيىنىڭ ديرەكتورى جاننا دۇيسەنبينا ادامدارمەن ەمىن-ەركىن سويلەسىپ، جاقسىلىق جاساۋعا دايىن تۇراتىن يرينانىڭ الداعى ۋاقىتتا ەلى ءۇشىن ايانباي ەڭبەكتەنەتىنىنە سەنەدى.