كولۋمبيا وكرۋگى مەن مەريلەند شتاتىنىڭ باس پروكۋرورلارى اقش پرەزيدەنتى دونالد ترامپتى سوتقا بەردى، دەپ جازادى قامشى اقپاراتتىق اگەنتتىگى. ولاردىڭ ايتۋىنشا، ترامپ كوررۋپسياعا قارسى زاڭنامانى بۇزعان كورىنەدى.
بي-بي-سي جاڭالىقتارىنىڭ مالىمەتىنە سۇيەنسەك، ارىز بەرۋشىلەر ترامپتىڭ بيزنەسىندەگى شەتەلدىك ينۆەستيسيالاردى مەملەكەت كونستيتۋسياسىنا قايشى دەپ ەسەپتەيدى. ترامپ پرەزيدەنت سايلاۋىندا جەڭىسكە جەتكەننەن كەيىن، ءوزىنىڭ بيزنەسىن ساقتاپ قالاتىنىن مالىمدەگەن.
ترامپ قاڭتار ايىندا ءوزىنىڭ شەتەل ينۆەستورلارىمەن بىرلەسكەن بيزنەس-اكتيۆتەرىن ۇلدارى باسقاراتىنىن، ءبىراق ول ءىستىڭ ءبارىن ءوز قاداعالاپ وتىراتىنىن مالىمدەگەن.
كولۋمبيا وكرۋگىنىڭ باس پروكۋرورى كارل رەيسين مەن مەريلەند شتاتىنىڭ باس پروكۋرورى برايان فروش ترامپ اقش كونستيتۋسياسىندا جازىلعان "قۇراما شتاتتاردىڭ لاۋازىمدى قىزمەتىندە جۇمىس ىستەيتىن مەملەكەتتىك شەنەۋنىك كونگرەستىڭ رۇقساتسىنسىز شەتەل باسشىلارىنان نە حانزادا، كورولدەرىنەن قانداي دا ءبىر سىيلىق، قىزمەت نە مارتەبە الا المايدى" دەگەن بابىن بۇزىپ وتىر دەيدى.
باسىم كوپشىلىگى رەسپۋبليكالىقتار بولىپ سانالاتىن اقش كونگرەسى ترامپتىڭ بيزنەسىمدى ساتپايمىن دەگەن مالىمدەمەسىنە ءمان بەرمەگەن. پروكۋرورلار بولسا، وزدەرىنىڭ شاعىمدارى بويىنشا تەپە-تەڭدىكتى ساقتاۋعا تىرىساتىندارىن ايتادى.
