الماتىدا ءوز بالاسىن قورعاماق بولعان 35 جاستاعى ايەل بوتەن بالانى ءۇيىنىڭ اۋلاسىندا سابادى، - دەپ حابارلايدى قامشى اقپاراتتىق اگەنتتىگى Tengrinews.kz سايتىنا سىلتەمە جاساپ.
قالالىق ءىىد-نىڭ رەسمي وكىلى سالتانات ازىربەكتىڭ ايتۋىنشا، بۇل دەرەك سوتقا دەيىنگى تەرگەۋلەردىڭ ءبىرىڭعاي رەەسترىندە تىركەلگەن. پوليسياداعىلار وقيعانىڭ 6 ماۋسىمدا بولعانىن ايتىپ بەردى. 10 جاستاعى بالا سوققىعا جىعىلعان. ونى 13 جاستاعى بالانىڭ شەشەسى ۇرعان. الەۋمەتتىك جەلىلەردە ۆيدەوباقىلاۋ كامەراسىنا تۇسىرىلگەن ۆيدەو پايدا بولدى.
روليك اۆتورىنىڭ ايتۋىنشا، بالالار باستاپقىدا توبەلەسىپ قالعان، وسىدان كەيىن بىرەۋىنىڭ شەشەسى جانجالعا ارالاسقان.
"2017 جىلدىڭ 6 ماۋسىمىندا بۇل دەرەك تىركەلىپ، اۋەزوۆ اۋداندىق ءىىب جپق ۋچاسكەلىك ينسپەكتورىنىڭ وندىرىسىنە بەرىلدى. بالانىڭ العان جاراقاتىنىڭ دەڭگەيىن انىقتاۋ ءۇشىن سوت-مەديسينالىق ساراپتاما تاعايىندالدى، ونىڭ قورىتىندىسى الىنعاننان كەيىن 1982 جىلعى ازاماتشاعا قاتىستى قىلمىستىق ءىس سوتقا جولدانادى"، - دەدى ءىىد وكىلى سالتانات ازىربەك.
