وقو تۇرعىنى باعلان تەمىربەكوۆ ءتورت بالاسىن جالعىز باعىپ وتىر. ءقازىر مۇگەدەك ۇلىمەن بىرگە وبلىستىق بالالار اۋرۋحاناسىندا جاتىر. نەگىزى باعلاننىڭ اۋرۋحانادا ەمدەلىپ جاتقان ۇلى دەنى ساۋ بولىپ تۋعان، دەپ حابارلايدى قامشى اقپاراتتىق اگەنتتىگى Stan.kz سايتىنا سىلتەمە جاساپ.

جۇبايى زارينامەن اجىراسقان سوڭ ، بالالارى اناسىنىڭ قاراۋىنا بەرىلگەن. كەيىن بەز بۇيرەك انا ۇلىنا قاراماي، ۇرىپ –سوعىپ، ءوز قولىمەن مۇگەدەك قىلىپتى. بۇل جونىندە ءتورت بالانىڭ اكەسى ءوز سۇحباتىندا ايتىپ بەردى.
باعلان ءقازىر ءبىر ايدان اسا ۋاقىت اۋرۋحانادا مۇگەدەك ۇلىمەن جاتىپ، ولمەستىڭ كۇنىن كەشۋدە. ويتكەنى دارىگەرلەر بالانىڭ ميىندا ىسىك پايدا بولعانىن ايتىپ. استانا قالاسىندا كۇردەلى وتا جاساۋعا قۇجاتتارىن راسىمدەپ جاتىر.

ءارى ناۋقاس بالانىڭ جاعدايى اۋىر بولعاندىقتان، دارىگەرلەردىڭ كۇندەلىكتى باقىلاۋىنا الىنعان.پەرزەنتىنىڭ مۇگەدەك بولۋىن باعلان جارى زارينانىڭ قاتەگىزدىگىنەن كورىپ وتىر. ولاي دەيتىنىمىز ولار اجىراسقان سوڭ، بالالار اناسىنىڭ قامقورلىعىنا بەرىلگەن. سول كەزدە ولاردى تۋعان اناسى قاتىگەزدىكپەن اياۋسىز سوققىنىڭ استىنا الىپتى. سونىڭ سالدارىنان ۇلى ءابدىراحمان مۇگەدەكتىككە ۇشىراپتى.

“قىزىم ءبىر اڭگىمەسىندە اناسىنىڭ ءىشىپ كەلىپ، ولارعا قول جۇمساعانىن ايتقان بولاتىن. الايدا وسى اڭگىمەسىنە ءمان بەرمەپپىن. “تۋعان اناسى عوي، بالالارىن مۇگەدەك ەتەردەي ۇرا قويماس” دەپ ويلادىم. كۇندەردىڭ كۇنىندە ءىشىپ كەلگەن اناسى ءابدىراحمان ەسىمدى بالامنىڭ جەلكەسىنەن قاتتى ۇرىپ جىبەرگەن. وسى كەزدە ۇلىمنىڭ مۇرنى ۇستەلگە ءتيىپ، قان جوسا بولعان.

كەيىن ۇلىم قاتتى سوققىدان جىلاعان سوڭ، قايىن اتام ونى ءتۇننىڭ جارىمىندا قوي قوراعا قاماپ قويعان. وسى جاعدايدان سوڭ، ۇلىم پسيحولوگيالىق سوققى الىپ، باسىنىڭ اۋرۋى جيىلەي ءتۇستى. كەيىن ۇيگە ۇلىمدى اكەپ جۇرگەندە ول ماعان “پاپا باسىم اۋىرادى، قۇسقىم كەلەدى ” دەپ شاعىمدانۋدى باستاپ، ونىسىمەن قويماي قورىلداۋى دا جيىلەي ءتۇستى.

كەيىن بالامدى دارىگەرلەرگە كورسەتكەن ەدىم، تۇماۋ بولىپ قالعان دەپ ءدارى جازىپ بەردى. ءتۇرلى ۋكول دا سالدى. اۋرۋحاناعا جىبەرەدى، ءتۇرلى ەم قابىلداتتى. ءبىراق، اۋرۋدىڭ ناقتى سەبەبىن تاپپاعان سوڭ، ەمنىڭ ەش ناتيجەسى بولمادى.

كەيىن وبلىستىق بالالار اۋرۋحاسىنداعى دارىگەرلەرگە كورسەتكەن ەدىم، مرت عا تۇسىرۋگە كەڭەس بەردى. بۇل تەكسەرۋدەن كەيىن ۇلىمنىڭ ميىنا سۋ جينالىپ، ىسىك پايدا بولعانى انىقتالدى.ياعني، اناسى ۇرعاننان سوڭ، بالامنىڭ باسىندا ىسىك پايدا بولىپتى.” ،- دەيدى ءتورت بالانىڭ اكەسى باعلان تەمىربەكوۆ.

باعلاننىڭ ايەلىمەن اجىراسقانىنا بەس جىلدان اسقان. ولاردا ورتاق بەس بالا بار. ءقازىر ولاردىڭ تورتەۋى اكەلەرىمەن تۇرادى. بالالارى اناسىنىڭ قاسىنا بارمايمىن دەپ جىلايدى ەكەن. سوندىقتان، اكە ءتورت پەرزەنتىن باۋىرىنا باسىپ، ءوزى قاراۋىنا تۋرا كەلگەن.

وعان قوسا، بالالارىنىڭ اناسى پەرزەنتەرىن ۇنەمى ءبىر بولمەگە قاماپ، ءوزى اپتالاپ جوعالىپ كەتەدى ەكەن. مۇنى ەسى كىرىپ قالعان قىزدارى دا ايتىپ وتىر. ءبىراق، زاڭ جاعىنان الىپ قاراعاندا، بالار زارينانىڭ قاراۋىندا بولۋى ءتيىس.

ويتكەنى، سوت شەشىمى بويىنشا بالالار اناسىنىڭ قامقورلىعىنا بەرىلسىن دەگەن ۇكىم شىعارىلعان. اكەلەرى اۋرۋحانادا جاتقان كەزدە، ءۇش بالا ءوز اتا-اجەسىنىڭ قاراۋىندا.

” بالالارىمنىڭ اناسىنا قاتىگەزدىگى ءۇشىن اشۋلىمىن. ۇنەمى وسى. بالا شاعاسىن تاستاپ كەتىپ، ءوزى جايباراقات قاڭعىرىپ جۇرە بەرەدى. اۋدانداعى سوت وكىلدەرى مەن ۋچاسكەلىك پوليسەيلەردە ونىڭ بۇل ارەكەتىن جاقسى بىلەدى. ءبىراق، زاڭ جاعىنان شەشىم قابىلداعاندا، زارينانىڭ پايداسىنا شەشەدى. بارلىعى ءبىر اۋىزدان كەلىسىپ العانداي.

مەن بالالاردى زاڭدى تۇردە ءوزىمنىڭ قاراۋىما العىم كەلەدى. بۇل ءۇشىن تالاي ەسىكتى توزدىردىم. دەگەنمەن، ەشقانداي ناتيجە جوق. جانە دە تۋعان ۇلىن ۇرىپ سوعىپ، مۇگەدەك قىلعان انانىڭ جاۋاپقا تارتىلۋىن سۇرايمىن.” ،-دەيدى ءتورت بالانىڭ اكەسى.

جالعىز باستى اكە مەن ناۋقاس بالانىڭ اۋرۋحاناداعى الەگى ءالى جىلدارعا سوزىلاتىن سياقتى. ويتكەنى مۇگەدەك بالانى ءالى الدا كۇردەلى وتا كۇتىپ تۇر. وتادان كەيىن بالاعا كۇتىم مەن وڭالتۋ ەمدەرى قاجەت.

ءبىراق، دارىگەرلەر مۇگەدەك بالانىڭ تولىق ساۋىعىپ كەتۋىنە ەشقانداي كەپىلدىك بەرمەي وتىر. ءقازىر ناۋقاس بالا وزدىگىنەن تىنىس الا المايدى، اپپاراتتقا تاڭىلعان. وعان قوسا سويلەۋدەن قالىپ، جۇرە دە المايدى.سوندىقتان، دارمەنسىز اكە كۇندىز ءتۇنى ۇلىنىڭ قاسىنان شىقپاي، قامقورلىق كورسەتۋدە. ال بالالاردىڭ اناسى بولەك تۇرىپ جاتىر.