مەملەكەت باسشىسى تاتارستان رەسپۋبليكاسىنىڭ پرەزيدەنتى رۋستام ميننيحانوۆپەن كەزدەستى دەپ حابارلايدى قامشى اقپاراتتىق اگەنتتىگى akorda.kz-كە سىلتەمە جاساي وتىرىپ. كەزدەسۋدە نۇرسۇلتان نازاربايەۆ پەن رۋستام ميننيحانوۆ استانا مەن قازان اراسىنداعى مادەني جانە ەكونوميكالىق ىنتىماقتاستىق ماسەلەلەرىن تالقىلادى.
مەملەكەت باسشىسى ر.ميننيحانوۆتى رەسەي كۇنىمەن قۇتتىقتاپ، ەكى ەل اراسىندا قالىپتاسقان دوستىق قاتىناستار تۋرالى ايتتى.
– رەسەيمەن دە، تاتارستانمەن دە ارامىزدا دوستىق قارىم-قاتىناس ورنىققان. قازاقتار مەن تاتارلار تاريحى، مادەنيەتى، ءتىلى مەن ادەت-عۇرپى جاعىنان بىر-بىرىنە وتە جاقىن. ەكونوميكالىق بايلانىستارىمىز دا جاقسى. «KAMAZ» كاسىپورنىمەن جۇمىس جۇرگىزىپ كەلەمىز، الماتىداعى تىكۇشاق زاۋىتىنا قاتىستى جوبانى ىسكە اسىرۋدامىز. وسى جانە باسقا دا ەكونوميكالىق بايلانىستاردى، سونىڭ ىشىندە مۇناي حيمياسىنا قاتىستى بايلانىستى جالعاستىرا بەرۋ كەرەك، - دەدى نۇرسۇلتان نازاربايەۆ.
تاتارستان پرەزيدەنتى قازاقستانعا كەلگەن ميسسياسى تۋرالى ايتىپ، ەلوردامىزدىڭ جاڭا ارحيتەكتۋرالىق نىساندارىن جانە «استانا ەكسپو-2017» كورمە كەشەنىن ارالاپ كورگەننەن كەيىنگى اسەرى جونىندە وي ءبولىستى.
– بۇگىن ەكسپو-داعى ەكسپوزيسيامىزدى اشتىق. سونىمەن قاتار، قازاقستانداعى سەرىكتەستەرىمىزبەن بىرگە بولاشاق جوسپارلارىمىزدى تالقىلادىق. كورمە كەشەنى مەنى قايران قالدىردى. ءسىزدى كورمەنىڭ اشىلۋىمەن قۇتتىقتايمىز. سونداي-اق، قالا كوشەسىنە سۇيىمبيكەنىڭ اتى بەرىلۋىنە وراي ريزاشىلىعىمدى بىلدىرەمىن، – دەدى ر.ميننيحانوۆ.
نۇرسۇلتان نازاربايەۆ پەن رۋستام ميننيحانوۆ «باتىس جۇڭگو – باتىس ەۋروپا» جولىن سالۋ اياسىنداعى ينفراقۇرىلىمدىق جوبالاردى ىسكە اسىرۋ جانە قازاقستان مەن تاتارستاننىڭ كولىكتىك-ترانزيتتىك الەۋەتىن ارتتىرۋ ماسەلەلەرىن تالقىلادى.
كەزدەسۋ سوڭىندا ر.ميننيحانوۆ قازاقستان پرەزيدەنتىن «تاتارستان رەسپۋبليكاسىنا سىڭىرگەن ەڭبەگى ءۇشىن» وردەنىمەن ماراپاتتاپ، مەملەكەت باسشىسىن تاتارستانعا كەلۋگە شاقىردى.
