كەشە رەسەيدىڭ كوپتەگەن قالالارىندا وپپوزيسيالىق قارسىلىق اكسياسى ءوتتى دەپ حابارلايدى قامشى اقپاراتتىق اگەنتتىگى bbc-گە سىلتەمە جاساپ. پوليسيا 1000 ادامدى ۇستادى. ساراپشىلاردىڭ ايتۋىنشا، رەسەي كۇنىندە نارازىلىق شەرۋىنىڭ ءوتۋى ەڭ الدىمەن وپپوزيسيالىق بەلسەندىلىكتىڭ ارتقانىن كورسەتەدى. ۇستالعانداردىڭ اراسىندا الەكسەي ناۆالنىي دا بار. ونى 30 كۇنگە قاماۋعا الۋ تۋرالى شەشىم شىقتى. وپپوزيسيالىق بەلسەندى ناۆالنىيدى ۇيىنەن شىعىپ بارا جاتقان جەرىنەن پوليسەيلەر ۇستاپ اكەتكەن. بۇل تۋرالى ونىڭ ايەلى ب ا ق حابارلاپ ايتقان. 

كيريلل روگوۆ، پۋبليسيست

ءقازىر ءبىز بۇرىنعىمەن سالىستىرعاندا ادامداردىڭ نارازىلىق شەرۋىنە شىعۋعا دەگەن جوعارى دايىندىعىن كورىپ وتىرمىز. پوليسيانىڭ دا جاقسى دايىندالعانىن بايقاۋعا بولادى. پۋشكين الاڭىنا اكسيانى بولدىرماۋى ءۇشىن كەلگەن پوليسەيلەردىڭ سانىندا شەك جوق.

ەگەر ماسكەۋدەگى اكسيانى ايتار بولساق، نارازىلىق شەرۋىنە شىققان ادامداردىڭ سانى 2011-2012 جىلداردان بەرى وسپەگەن. دەسەك تە، ەكى وزگەرىس بار. بىرىنشىدەن، جاستاردىڭ بەلسەندىلىگى ارتتى. ەكىنشىدەن، قارسىلىق اكسياسىنىڭ شەكاراسى كەڭەيە ءتۇستى. باستى قالالاردان شالعايدا ورنالاسقان قالالاردا ءوز نارازىلىقتارىن بىلدىرە باستادى.

دەگەنمەن، بيلەۋشى رەجيمگە ساياسي داعدارىس اكەلەتىندەي دەڭگەي تۋرالى ايتۋ ەرتە.

ۆياچەسلاۆ دانيلوۆ،ساياسي ساراپتاما ورتالىعىنىڭ اتقارۋشى ديرەكتورى

ساياسي تۇرعىدا بۇل قارسىلىق اكسياسى ناۆالنىي ءۇشىن ءتيىمدى. ءتىپتى ماسكەۋدە ەمەس، وزگە ايماقتاردا ادامدار نارازىلىق شەرۋىنە شىققان. وندا ناۆالنىي ءوز شتابىن اشتى. ول ءۇشىن بۇل ۇلكەن جەتىستىك.

اقش پرەزيدەنتىنىڭ باسپا ءسوز حاتشىسى شون سپايسەر قارسىلىق اكسياسىنا قاتىسقانداردى دەرەۋ بوساتۋعا شاقىردى. سونىمەن قاتار، پوليسيا تاراپىنان ۇستالعانداردى بوساتۋدى حالىقارالىق Amnesty International قۇقىققورعاۋ ۇيىمى دا تالاپ ەتتى. 

   شولۋشى: اسەم المۇحانبەت