الەۋمەتتىك جەلىدە پوليسەيلەردى بالاعاتتاعان پاۆلودارلىق جارتى ميلليون تەڭگەدەن استام ايىپپۇل تولەۋى مۇمكىن.

پاۆلودار وبلىستىق ءىىد-نىڭ باسپا ءسوز قىزمەتى ۇسىنعان اقپاراتقا سۇيەنسەك، ۆكونتاكتە الەۋمەتتىك جەلىسىندەگى «تيپيچنىي پاۆلودار» قاۋىمداستىعىندا پايدالانۋشىلاردىڭ ءبىرى قۇقىق قورعاۋ ورگاندارىنىڭ وكىلدەرىنە ءتىل تيگىزگەن. بۇل تۋرالى قامشى اقپاراتتىق اگەنتتىگى پاۆلودار جاڭالىقتارىنا سىلتەمە جاساپ حابارلايدى.

 پوليسيا قىزمەتكەرلەرىن بالاعاتتاعانى ءۇشىن ءتارتىپ ساقشىلارى وبلىس ورتالىعىنىڭ 26 جاستاعى تۇرعىنىن انىقتادى جانە قاماۋعا الدى. - 26 جاستاعى ايەل ادام ءوزىنىڭ ارەكەتتەرى زاڭسىز ەكەنىن سەزىنە وتىرىپ، پوليسيا قىزمەتكەرلەرىنىڭ ار-نامىسىنا تيەتىن تۇرپايى لەكسيكا قولدانعان.

 بۇزاقىلىققا جول بەرگەن ازاماتشا قاماۋعا الىنىپ، ءوز كىناسىن مويىندادى. اتالمىش فاكتى بويىنشا ق ر قپك 378-بابى بويىنشا سوتقا دەيىنگى تەرگەپ-تەكسەرۋ تاعايىندالدى. ول 300 اەك-گە دەيىن ايىپپۇل تولەۋ تۇرىندە جاۋاپكەرشىلىككە تارتىلۋى مۇمكىن. سونداي-اق زاڭعا سايكەس 240 ساعاتتىق مەرزىمگە دەيىنگى قوعامدىق جۇمىستارعا تارتىلادى نەمەسە 75 تاۋلىككە دەيىن قاماۋعا الۋ جازالارى قارالعان، - دەيدى باسپا ءسوز قىزمەتىندە.
 

شولۋشى: ايگەرىم تاۋباي