2001 جىلدان بەرى سىبايلاس جەمقورلىق قىلمىسى بويىنشا 10 مىڭنان استام ادام سوتتالدى، دەپ جازادى قامشى اقپاراتتىق اگەنتتىگى sputniknews.kz پورتالىنا سىلتەمە جاساپ. بۇل جونىندە ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى اليك شپەكبايەۆ مالىمدەدى.

"سىبايلاس جەمقورلىق فاكتىلەرى بويىنشا سوتتالعانداردىڭ 70 پايىزى اتقارۋشى بيلىك ورگاندارىندا قىزمەت ەتكەن. 2001 جىلدان ەنگىزىلگەن سىبايلاس جەمقورلىق قىلمىسى بويىنشا رەسمي ستاتيستيكا وسى جىلداردا اتالعان فاكتى بويىنشا 10 مىڭنان استام ادامنىڭ سوتتالعانىن كورسەتىپ وتىر. وسى ۋاقىتتا جەمقورلىق قىلمىستاردان كەلگەن ماتەريالدىق شىعىن 240 ميلليارد تەڭگەدەن استى. ونىڭ 44 پايىزى قايتارىلدى. بۇل جەمقورلىققا قارسى كۇرەس قىزمەتىنىڭ تيىمدىلىگى مەن ازاماتتىق قوعامنىڭ قولداۋى ارتقانىنىڭ ناتيجەسى"، — دەدى شپەكبايەۆ بۇگىن ۇكىمەت وتىرىسىندا.

ورتالىق اتقارۋشى ورگانداردىڭ ىشىندە سوتتالعانداردىڭ سانى بويىنشا ىشكى ىستەر، قارجى، ادىلەت، قورعانىس، اۋىل شارۋاشىلىعى مينيسترلىكتەرى كوش باسىندا تۇر.

"2016 جىلى ىشكى ىستەر ورگاندارىنىڭ قىزمەتكەرلەرىنە قاتىستى تىركەلگەن 398 فاكتىنىڭ ەلۋ پايىزعا جۋىعى جەرگىلىكتى پوليسيا قىزمەتىمەن بايلانىستى. وسى سالادا جەمقورلىقپەن كۇرەس بويىنشا جوسپار ازىرلەپ، ىسكە اسىراتىن قاجەتتىلىك تۋىنداپ وتىر"، — دەدى ول.

اگەنتتىك ءتوراعاسىنىڭ مالىمەتىنشە، قارجى مينيسترلىگىندە سوتتالعانداردىڭ 86 پايىزى — كەدەندىك، سالىق، سونداي-اق، ەكونوميكالىق تەرگەۋ قىزمەتىنىڭ قىزمەتكەرلەرى. ال جەرگىلىكتى اتقارۋشى ورگاندار ىشىندە ءبىلىم بەرۋ ۇيىمدارى، اكىمدەردىڭ اپپاراتى، قۇرىلىس، تۇرعىن ۇي-كوممۋنالدىق، مادەنيەت جانە تىلدەردى دامىتۋ سالالارى ەڭ جەمقور بولىپ وتىر.

وڭىرلەر اراسىندا رەيتينگتى شىعىس قازاقستان، وڭتۇستىك قازاقستان، قاراعاندى جانە جامبىل وبلىستارى باستايدى.

شولشۋى: گۇلىم جاقان