الماتىداعى ارداگەرلەر ۇيىندەگى قاريالارعا گازەت ساتقىزىپ، اقشا ماجبۇرلەيتىندىگى جايىندا ەمدەلۋشى قارتتاردىڭ ءبىرى ايتىپ بەردى، دەپ حابارلايدى قامشى اقپاراتتىق اگەنتتىگى.
Instagram جەلىسىندە ztb_video توبىندا ارداگەرلەر ۇيىندەگى شىندىقتىڭ بەتىن اشقان ۆيدەو جاريالاندى.
ۆيدەونى جولداۋشىلاردىڭ ءبىرى كوشەدە كورگەن وقيعاسىمەن ءبولىسىپ، ونى ۆيدەوعا ءتۇسىرىپ ينتەرنەتكە جولداعان. كوشەدەگى قاريالاردىڭ ءبىرى قاقپانىڭ ارتقى جاعىندا تۇرىپ ارى-بەرى وتكەن ادامداردان گازەت ساتىپ الۋىن وتىنگەن. كۋاگەرلەردىڭ ايتۋىنشا، ولاردى ارداگەرلەر ءۇيىنىڭ قىزمەتكەرلەرى قيناپ وسىنداي ىسكە سالادى ەكەن.
«بۇل كورىنىسكە ءمان بەرمەي ءوتىپ كەتە المادىم. قاقپانىڭ ار جاعىندا تۇرعان بۇل قارت كىسى كوشەدە وتكەن ادامدارعا گازەت كورسەتىپ، ونى ساتىپ الۋلارىن ءوتىنىپ تۇردى. الايدا، ادامدار ولاردىڭ سوزدەرىن قۇلاقتارىنا دا ىلمەدى. نە بولعانىن سۇرايىن دەپ بارعانىمدا، ول كىسىنىڭ ءبىر گازەتتى 35 تەڭگەدەن ساتىپ تۇرعانىن ءبىلدىم. الايدا، نەگە؟ بەلگىلى بولعانداي، بۇل ارداگەرلەر ءۇيى ەكەن جانە بۇل جەردە اقشاسى جوق ارداگەرلەردى وسىلاي اقشا تابۋعا ماجبۇرلەيدى ەكەن. سونىمەن قاتار، ولاردىڭ الاتىن زەينەتاقىسىن دا بىرەۋلەر الىپ قوياتىن ءتارىزدى. ولار وسىندا تۇرادى، كۇنىنە ءۇش كۇن تاماقتاندىرادى، كيىندىرەدى. ءبىراق، كىم ءسال عانا كەشىكسە اش قالادى ەكەن. جاقىن ماڭدا تۇراتىن ادامدار ولارعا ازداپ تاماقتار الىپ كەلىپ، كومەكتەسىپ تۇرادى ەكەن. نەگە ارداگەرلەر، زەينەتكەرلەر مۇنداي جۇمىس اتقارىپ، وتكەن-كەتكەن ادامداردان تاماق الىپ كەلۋىن تىلەيدى؟ مۇنداي سوراقىلىقتى جوياتىن ادام جوق پا؟ الماتى، مومىش ۇلى داڭعىلى، ارداگەرلەر ءۇيى»، - دەپ جازادى ۆيدەو اۆتورى.
شولۋشى: نازەركە لابيحان
