تالدىقورعاندا مەديسينا قىزمەتكەرلەرى كۇنى قارساڭىندا سالتاناتتى جيىن ءوتىپ، جىل قورتىندىسى بويىنشا ۇزدىك دارىگەرلەر مەن مەديسينا مەكەمەلەرى انىقتالدى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.
الماتى وبلىسىنىڭ ۇزدىك دارىگەرى بولىپ ىلە اۋداندىق اۋرۋحاناسىنىڭ حيرۋرگيا ءبولىمىنىڭ مەڭگەرۋشىسى ايدىن ەلىكبايەۆ تانىلدى. ال وبلىستاعى ۇزدىك اۋىل دارىگەرى اتاعىن تالدىقورعان قالاسىنا قاراستى ەركىن اۋىلدىق امبۋلاتورياسىنىڭ مەڭگەرۋشىسى اسكەربەك ورالبايەۆ جەڭىپ الدى.
ەكەۋىنە دە وبلىس اكىمى اماندىق باتالوۆ «لادا گرانتا» كولىگىنىڭ كىلتتەرىن تابىستادى. سونداي-اق ءوڭىر باسشىسى ۇزدىك دەنساۋلىق ساقتاۋ مەكەمەلەرىنە قارجىلاي سىيلىقتار تاپسىردى.
جالپى الماتى وبلىسىنىڭ دەنساۋلىق ساقتاۋ سالاسىندا 19 مىڭ ادام ەڭبەك ەتەدى. تۇرعىندارعا 600-دەن استام مەديسينالىق مەكەمە ساپالى قىزمەت كورسەتىپ كەلەدى. سوڭعى 5 جىلدا دەنساۋلىق ساقتاۋ سالاسىنا بولىنەتىن قارجى كولەمى 59 پايىزعا ءوسىپ، 2017 جىلى 83،6 ملرد تەڭگەگە جەتتى. 2017-2018 جىلدار ارالىعىندا 22 مەديسينالىق نىسان سالۋ جوسپارلانىپ وتىر.
