قازاقستاندىق جىگىت الەۋمەتتىك جەلىدەگى تىكەلەي ەفير كەزىندە وز-وزىنە قول جۇمسادى، دەپ جازادى قامشى اقپاراتتىق اگەنتتىگى. بەكجان قانكەنوۆتىڭ ءولىمى تۋرالى Facebook جەلىسىندە ونىڭ قۇربىسى الەنا ميروشنيچەنكو جازدى.

"دوستار، بەكا ەندى ارامىزدا جوق. اسىلىپ قالىپتى جانە ءبارىن تىكەلەي ەفيرگە ءتۇسىرىپتى. پاراقشاسى بۇعاتتالعان"، — دەپ جازدى ميروشنيچەنكو جەكە پاراقشاسىندا.

Sputnik قازاقستان قايتىس بولعان ازاماتتىڭ قۇربىسىمەن تەلەفون ارقىلى حابارلاستى.

"ول مەنىڭ فەيسبۋكتەگى جاقىن دوسىم ەدى، ءبىراق فەيسبۋكتەن تىس تا ارالاساتىنبىز. بىرنەشە رەت مىناداي جازبالار جازعان: "جۇرەگىم اۋىرادى، ومىرمەن قوش ايتىسقىم كەلەدى، ءولىپ كەتسەم بە ەكەن". قايداعى-جوقتى جازىپ، قالجىڭدايتىن… تاڭەرتەڭ ونىڭ قۇربىسى جازدى. جاقىندا قوڭىراۋ شالىپ، دەنەسىنىڭ ءالى ءىلۋلى تۇرعانىن ايتتى. پوليسيانى كۇتىپ، تۇسىرمەي وتىر ەكەن. ءۇيى قويانقۇس اۋىلىندا. ول جاقسى، مەيىرىمدى جىگىت بولاتىن، جۇمساق ويىنشىقتارمەن بىرگە ۇيىقتايتىن… بەكجان — سۋرەتشى"، — دەدى سۇحبات بەرۋشى تەلەفون ارقىلى. 

الەنا ميروشنيچەنكو سوزىنە سۇيەنسەك، بەكجان قانكەنوۆ ەكەۋى الەۋمەتتىك جەلىدەن تىس تا جاقسى دوستار ەكەن. ومىردە دە ارالاس-قۇرالاس بولعان كورىنەدى.

 "ءبىز 2014 جىلى فەيسبۋكتە تانىستىق. ارالاسىپ، ومىردە دە كەزدەستىك — الەۋمەتتىك جەلىدە دوس بولعاسىن، ومىردە دە كەزدەسەيىك دەپ شەشتىك. تانىسىپ، دوستارىمىزبەن جينالدىق. كاۋاپ جەۋگە، سىرا ىشۋگە، كونسەرتكە، كلۋبقا باراتىنبىز… ونى ءبارى جاقسى كورەتىن. پاراقشالارىن ۇنەمى اۋىستىرىپ وتىرۋشى ەدى، سەبەبى ۇنەمى بۇعاتتاپ تاستايتىن".

ءولىمنىڭ ءمان-جايىنا كەلەر بولساق، سۇحبات بەرۋشى ول جاعىنان بەيحابار ەكەن. ءبىراق ميروشنيچەنكو بۇدان بۇرىن دا دوسىنىڭ سۋيسيد تۋرالى ويلارىن بايقاپتى.

"وزىمەن سويلەسكەنىمدە: قالجىڭدايمىن، ماڭگىلىك ءومىر سۇرەمىن دەيتىن. وزىنە نازار اۋدارعىسى كەلەتىن. ءبىر قىزبەن رەنجىسىپ قالسا، "جۇرەگىم توقتاپ قالدى دەپ ايتا سالىڭدار" دەگەن پوست جازاتىن. سونى كورىپ وزىنە جازا باستاساڭ: "جوعا، امان-ەسەنمىن، جاي انا ءبىر قىزدىڭ نازارىن اۋدارايىن دەگەنمىن" دەيدى. وزىنە كوڭىل بولگەنىن قالايتىن. ماس بولماسا، مىنەزى جايساڭ. ءبىراق كوبىنە ماس بولىپ ءجۇرۋشى ەدى"، — دەدى ميروشنيچەنكو.

كوز جۇمعان جىگىتتىڭ FB پاراقشالارىنىڭ بىرىندە وتكەن ءتۇنى شىققان حابارلاما بار: "ءبارىڭدى جاقسى كورەمىن. بۇگىن ىشىمدىك ىشەمىن. ىلمەك جاسادى، اسىلىپ قالعىم كەلەدى".

ىلە اۋداندىق ءىىب قويانقۇس اۋىلىندا تۇراتىن بەكجان قانكەنوۆتىڭ وز-وزىنە قول سالعانى تۋرالى مالىمەتتى راستادى. جىگىتتىڭ دەنەسى تاڭەرتەڭ 7:29-دا تابىلعان.

شولۋشى: گۇلىم جاقان