ماسكەۋدە ءبىر ايەل «ءحوندا-سولياري» اۆتوكولىگىمەن اۋلادا جۇرگەن 6 جاستاعى الەشا شيمكو ەسىمدى ءبۇلدىرشىندى قاعىپ كەتكەن. كولىك يەسىنىڭ ايتۋىنشا، بالا ماس كۇيىندە جۇرگەن ەكەن، دەپ حابارلايدى قامشى اقپاراتتىق اگەنتتىگى جەرگىلىكتى باق-قا سىلتەمە جاساپ.

اتالمىش وقيعادان كەيىن ساراپتاما جۇرگىزىلدى. قۇجاتتاردا كورسەتىلگەندەي، بالا وتە قاتتى ماس بولعان ەكەن. ال تەرگەۋشى وسى قۇجاتتارعا سايكەس بالا كولىكتىڭ استىنا ءوزى كەلىپ ءتۇستى دەگەن قورىتىندى جاساعان.

وقيعا پاۆلينو ميكرواۋدانىندا №39 ءۇيدىڭ جانىندا ورىن العان. ول ۋاقىتتا الەشا ءوزىنىڭ اتاسىمەن سەرۋەندەپ كەلە جاتقان بولاتىن. جەڭىل اۆتوكولىك بالانى باسىپ ءوتىپ، 10 مەتردەي جەرگە دەيىن سۇيرەپ الىپ كەتكەن. اۋىر جاراقاتتىڭ سالدارىنان بالاقاي وقيعا ورنىندا كوز جۇمدى.

جول اپاتىن كوزىمەن كورگەن كۋاگەرلەردىڭ ايتۋىنشا، ايەل بالانى قاقپاستان الدىن جوعارى جىلدامدىقپەن قوزعالا وتىرىپ تەلەفونمەن سويلەسىپ كەلە جاتقان، جىلدامدىعى شامامەن 50 كم\ساع.

الايدا 31 جاستاعى ولگا اليسوۆا بالانىڭ ءوزىن ايىپتاپ، كولىكتىڭ استىنا كەلىپ تۇسكەن ءوزى دەيدى.

اتالمىش وقيعاعا بايلانىستى ساراپتاما قورىتىندىسىندا بالانىڭ قانىنىڭ قۇرامىندا 2،7 پروميل الكوگول بولعاندىعىن كورسەتىپ وتىر. قۇجاتتاردا كورسەتىلگەندەي 6 جاستاعى ءبۇلدىرشىن الكوگول ءىشىپ العان ەكەن. مۇنداي قورىتىندىنى كورگەن بالانىڭ وتباسى ساراپتامانى قايت جۇرگىزۋدى تالاپ ەتىپ وتىر.

شولۋشى: نازەركە لابيحان