16 ماۋسىمدا بايلانىس جانە اقپارات قىزمەتكەرلەرى كۇنى قارساڭىندا الماتىدا جۋرناليستەر اراسىنداعى «مىڭ بوياۋلى قالا – گورود تىسياچي كراسوك» بايقاۋىنىڭ جەڭىمپازدارىن ماراپاتتاۋ شاراسى ءوتتى، دەپ حابارلايدى قامشى اقپاراتتىق اگەنتتىگى.

 اقپاراتتىق كەڭىستىكتەگى مەگاپوليستىڭ ۇزدىك وكىلدەرىن الماتى اكىمى باۋىرجان بايبەك، ق ر اقپارات جانە كوممۋنيكاسيا ۆيسە-مينيسترى الان اجىبايەۆ، ەلىمىزدىڭ جەتەكشى ب ا ق  باسشىلارى ماراپاتتادى.

بايقاۋ جەتى نوميناسيا بويىنشا ءوتتى: باق-تاعى ۇزدىك ماقالا، اقپاراتتىق اگەنتتىكتەردەگى (عالامتور رەسۋرستارى) ۇزدىك ماقالا، ۇزدىك راديو ماتەريال، الەۋمەتتىك جەلىدەگى ۇزدىك ماقالا (بلوگەرلەر ماتەريالدارى)، ۇزدىك فوتوماتەريال، ۇزدىك ينفوگرافيكا جانە ۇزدىك تەليەۆيزيالىق سيۋجەت.

«ۇزدىك  گازەت ماقالاسى» كاتەگورياسى بويىنشا «تۇركىستان» گازەتىنىڭ ءجۋرناليسى دينارا جەلدىبايەۆا جەڭىمپاز اتاندى، ال «ۇزدىك  راديوماتەريال» نوميناسياسى بويىنشا ەكى جۋرناليست-«استانا» راديوسىنىڭ مۋزىكالىق رەداكتورى ايگەرىم ءبىلالوۆا مەن «قازاق راديوسىنىڭ» ءجۋرناليسى امان تاسىعان جۇلدەنى ءوزارا ءبولىستى، قازاقتاردىڭ دۇنيەجۇزىلىك اسسياسياسى سايتىنىڭ رەداكتورى ەرلىك كەبەكباي عالامتورداعى ۇزدىك ماتەريال نوميناسياسىن جەڭىپ الدى،ۇزدىك ينفوگرافيكا جۇلدەسىن «IGRAPHIC» ديزاين بيۋروسىنىڭ باس ديرەكتورى باعلان ايداشوۆ السا، جاننا احمەتوۆا  الەۋمەتتىك جەلىلەردە ۇزدىك پوستار جاريالادى، ماكسيم ءزولوتۋحيننىڭ جۇمىستارى ۇزدىك فتوتوماتەريالدار دەپ تانىلدى، ال «ۇزدىك تەليەۆيزيالىق سيۋجەت»  نوميناسياسى بويىنشا «حابار اگەنتتىگى» اق الماتى فيليالىنىڭ ءجۋرناليسى ۇلان نارىنبەك پەن «استانا»  تەلەكانالىنىڭ ءجۋرناليسى ءادىل ونەربايەۆتار جەڭىمپاز اتاندى.

الماتى  اكىمى باۋىرجان بايبەك اۋماعى 500 شارشى مەتر بولاتىن «الماتى» تەلەارناسىنىڭ  جاڭا زاماناۋي پاۆيلونىندا بولدى.

سوڭعى ءبىر جارىم جىل ىشىندە كانالدى مودەرنيزاسيالاۋ جۇمىستارى ءجۇردى، قۇرال- جابدىقتار جاڭارتىلدى، وندىرىستىك تراكت 16ح9  جوعارى كورسەتىلىمدەگى ساندىق فورماتقا  كوشىرىلدى، الەمدىك تانىمال وندىرۋشىلەردەن جالپى قۇنى 1،2 ملرد. تەڭگە بولاتىن زاماناۋي تەليەۆيزيالىق تەحنيكالار ساتىپ الىندى.

بۇگىنگى كۇنى «الماتى» تەلەارناسىنىڭ قالانىڭ كەز - كەلگەن نۇكتەسىنەن تىكەلەي ەفيرگە شىعاتىن جانە اۋقىمدى شارالاردى دەر كەزىندە كورسەتە الاتىن جىلجىمالى تەليەۆيزيالىق ستانسياسى بار. كانال رەسپۋبليكانىڭ بارشا ايماعىن قامتيدى، سونىڭ ارقاسىندا بالامالى، ساندىق، سپۋتنيكتىك، كابەلدى جانە ينتەرنەت سەگمەنتتەگى حابارلاردى تاراتا الادى.

«تنس گەللاپ مەديا»اگەنتتىگىنىڭ مالىمەتى بويىنشا بيىلعى جىلى قالالىق  تەلەارنانى كورۋشىلەر قاتارى 2015 جىلمەن سالىستىرعاندا  26%-عا ارتقان.

جۇزەگە اسقان وسىناۋ يگى شارالاردىڭ ارقاسىندا «الماتى»  تەلەارناسىنا جارناما بەرۋشىلەر قاتارى ۇلعايۋدا. مىسالى،2016 جىلدىڭ قورىتىندىسى بويىنشا تەلەارنانىڭ جەكە تابىسى 112%-عا ارتىپ، 256 ملن. تەڭگەنى قۇرادى. قۇرىلعالى بەرى العاش رەت تەلەارنا جاقسى قارجىلىق كورسەتكىشكە قولجەتكىزدى. زاماناۋي اپپاراتۋرالارمەن جابدىقتالعان جاڭا ستۋديالىق پاۆيلون ىسكە قوسىلعان كەزدە «الماتى» تەلەارناسى جاڭا ساپالىق دەڭگەيگە كوتەرىلەتىن بولادى.