استانالىق جۇمىسكەرلەر ارتىق سۋ قورى مەن كۇننەن قورعايتىن قالپاق دايىنداپ، توزىمدىلىك تانىتۋلارىنا تۋرا كەلەدى. ەلوردادا ءبىر جارىم جۇما بويى اسپاپ ىستىق بولادى، - دەپ حابارلايدى Qamshy.kz ەلوردا اكىمدىگىنىڭ مەديا-ورتالىعىنا سىلتەمە جاساپ.

سالقىن كۇندەر ماۋسىمنىڭ 28-نەن كەيىن عانا كۇتىلەدى، - دەدى «قازگيدرومەت» ۇزاق مەرزىمدى بولجام جاساۋ باسقارماسىنىڭ اعا ينجەنەرى ايگۇل مىڭجانوۆا ەلوردا اكىمدىگىنىڭ مەديا-ورتالىق تىلشىسىنە.

جاقىن كۇندەرى سۋ قويمالارىنا بارىپ، شومىلۋدى جوسپارلاعاندارعا اۋا-رايى كەدەرگى كەلتىرمەيدى. سينوپتيكتەر 35 گرادۋسقا دەيىن ىستىق بولادى دەپ وتىر. دەمالىس كۇنى جاڭبىر جاۋۋى ىقتيمال. كەلەر اپتانىڭ باسىندا قاپىرىق ءسال باسەڭدەيدى، رەسەيدەن كەلەتىن سيكلون تەرمومەتر كورسەتكىشىن 30 گرادۋستان جوعارى كوتەرىلۋىنە مۇمكىندىك بەرمەيدى. الايدا، ارتىنان ىلە-شالا قازاقستانعا يراننان ىستىق اۋا ماسساسى كەلەدى. سول سەبەپتەن 21 ماۋسىمنان كەيىن سىناپ باعاناسى قايتادان جوعارى كوتەرىلەدى.

سينوپتيكتەردىڭ بولجامى بويىنشا ەڭ اپتاپ ىستىق كۇندەرى ماۋسىمنىڭ 26-27-ندە كۇتىلۋدە. ول كۇندەرى اۋا تەمپەراتۋراسى 39 گرادۋسقا دەيىن جەتەدى.

ادەتتە قازاقستاندا ەڭ ىستىق اي سانالاتىن شىلدەدە سينوپتيكتەردىڭ الدىن-الا بولجامى بويىنشا كۇن سالقىن ءارى جاڭبىرلى بولادى. ال تامىزدا قايتادان ىستىق كۇندەر كۇتىلۋدە، تەمپەراتۋرا كورسەتكىشى نورمادان ءبىر گرادۋسقا جوعارى بولادى.