الەۋمەتتىك جەلىدە قولدانۋشىلار «Foreign Policy(سىرتقى ساياسات)» جۋرنالى سايتىنىڭ اشىلماي قالعانىنا نازار اۋداردى دەپ جازادى Qamshy.kz.
قامشى ءتىلشىسى اتالعان جۋرنالدىڭ web بەتى قازاقستاندا نەگە اشىلماي تۇرعانىن ىزدەنىپ كوردى.
جاھاندىق ساياسات، ەكونوميكا، ينتەگراسيا تاقىرىپتارىن جازاتىن، ەكى ايدا ءبىر باسىلىپ شىعاتىن تانىمال جۋرنالدا 15 ماۋسىمدا قازاقستان تۋرالى ماقالا شىققان. «قازاقستان ءولىم جۇلدىزىن جاساۋعا 5 ميلليارد دوللار جۇمسادى ءبىراق ول لازەرمەن اتا المايدى» دەپ اتالاتىن ماقالادا EXPO-نىڭ باس نىسانى «نۇرلى الەم» ۇلتتىق پاۆيلونى «ءولىم جۇلدىزىنا» تەڭەلىپ، مىسقىلعا الىنعان. «ءولىم جۇلدىزى – «جۇلدىزدى سوعىستار» فيلمىندەگى بۇكىل عالامشاردى قيراتۋعا جەتكىلىكتى كۇشى بار قارۋلانعان عارىشتىق ستانسيانىڭ اتاۋى. ماقالا اۆتورى EXPO-Astana-نىڭ باس نىسانىن فيلمدەگى عارىش ستانسياسىنا ۇقساتقان.
اۆتور ماقالاسىندا ورتالىق ازيانىڭ استاناسى الەمگە ايگىلەپ جارقىراتىپ كورمە سالعانىن، الايدا «وعان قوناق شاقىرۋدى» ۇمىتىپ كەتكەنىن، پوستسوۆەتتىك ەلدە كورمەنىڭ اشىلۋىندا دا ىعى-جىعى ادام بولماعانىن ايتادى. سونداي-اق ول، EXPO-نىڭ ءدۇبىرى ەستىلگەندە قازاقستاننىڭ 5 ميلليون قوناق كەلەدى دەپ كۇتكەنىن، بىرتە-بىرتە «ارمانىنىڭ» 2 ميلليون، 1 ميلليونعا دەيىن ازايعان، اقىر سوڭىندا اشىلۋ سالتاناتىندا 10 مىڭداي عانا ادام بولعانىن جازا كەلە، 2010 جىلى شانحاي كورمەسىندە 73 ميلليون ادام بولعانىن ەسكە الادى.
ماقالا اۆتورى ارى قاراي قازاقستاننىڭ ىشكى-سىرتقى ساياساتىن سارالاي كەلە، ءتىپتى EXPO-نىڭ الماتىدا وتپەگەنىنە دە «قىنجىلىس» بىلدىرەدى.
FP جۋرنالى وسى ماقالانى باسقان سوڭ قازاقستاندا اشىلماي قالدى ما ول جاعى بەلگىسىز. قامشى ءتىلشىسى قازاقستاندىق پروۆايدەرلەرگە قوڭىراۋ شالىپ كوردى. الايدا ماردىمدى جاۋاپ الا المادى.
تانىمال جۋرنال باسقان ماقالا EXPO وتكىزگەن ەلدىڭ شىمبايىنا باتتى ما؟ ول جاعى دا بەلگىسىز. ءبىر انىعى EXPO باستالعالى باسىنان داۋ ارىلماي كەلەدى. قازاقستانداعى ەڭ جەكسۇرىن قىلمىس جەمقورلىقپەن شاتىلىپ ءبىرىنشى باسشىسى قاپاسقا قامالدى. وتكەن جىلى قاراشادا ەكسپو-نىڭ بىرنەشە پاۆيلونى قۇلادى. سول كەزدە ءتىپتى EXPO سالۋعا اقشا جوق دەپ ەسىموۆ كاسىپكەرلەردەن اقشا دا جينادى. سوڭعى ءبىر جىل بويى اۋىل مۇعالىمدەرىنە ەكسپو بيلەتتەرىن كۇشتەپ العىزىپ جاتقانى اقپارات شىعىپ كەلگەندە ەلەڭ ەتپەگەن ەدىك، ءتىپتى سول بيلەتتەر جاساندىلارى بار بوپ شىقتى.
ءبىزدىڭ قايعىمىز اقش-تىڭ الپاۋىت جۋرنالىنىڭ قازاقستاندا اشىلماي قالعانى ەمەس، سول جۋرنالدا جاقسى جاعىنان كورىنە الماعانىمىز؛ سول جۋرنالدى وقىعان مىڭداعان وقىرماننىڭ قازاقستان تۋرالى قالىپتاساتىن پىكىرى... وسى ساتتەردە امالسىز، ىرىقسىز استانا بەتتەپ بارا جاتقان اۋىل مۇعالىمدەرىنىڭ كۇيى...
نۇرعالي نۇرتاي
