سوڭعى ۋاقىتتا قازاق-قىتاي ديپلوماتيالىق بايلانىسى نىعايىپ كەلەدى. مامىر ايىندا «ءبىر بەلدەۋ، ءبىر جول» ەكونوميكالىق فورۋمى اياسىندا نازاربايەۆ بەيجىڭدە جۇڭگو باسشىسىمەن كەزىكسە، كۇنى كەشە جۇڭگو پرەزيدەنتى اقوردادا نازاربايەۆپەن تاعى كەزدەستى. ءتىپتى استانادا وتكەن شىۇ سامميتىنە قاتىسىپ، EXPO-نىڭ اشىلۋىندا دا ەلباسىنىڭ وڭ تىزەسىندە وتىردى. وسى قارساڭدا ەكى ەلدىڭ مادەني بايلانىسى دا قويۋلاپ، استانادا جۇڭگو كينوسى فەستيۆالى اشىلدى.
قازاقستان-قىتاي مادەني بايلانىسىنىڭ جارقىن كورىنىسى رەتىندە وتانداسىمىز ديماش قاتىسقان قىتايدىڭ حۋنان تەلەارناسى وتكىزگەن «مەن ءانشىمىن» جوباسى تاريحتا قالدى. وسى بايقاۋدا ميللياردقا قازاق اتىن تانىتقان، قاتارىنان قارا ءۇزىپ شىققان ديماشقا حالىقتىڭ ىقلاسى مەن قوشامەتى بولەك.
وسى ورايدا قىتايداعى قازاق زيالىسى، قوعام قايراتكەرى، اقىن تىلەبالدى ابدرەشيت ۇلى ديماشقا ءان ارناعان. انگە سازدى جاقسىبەك قالەلبەك ۇلى جازعان. ورىنداعان جاس ءانشى ەلجاي بايدوللا قىزى.
ءاندى ankui.kz سايتىنان تىڭداي الاسىزدار.
ءان ءسوزى:
ديماش
جىبەك جايدىڭ جاڭا اۋەنىمەن كونە ىزگە
جىبەك جولى ەلشىسى بولىپ سەن بىزگە.
ۇلى ەكى ەل ۇل-قىزى ۇقساپ ەگىزگە،
ۇلى قۇرلىق ۇلاستى ۇلى تەڭىزگە.
كوركەم تاڭنىڭ كۇنى بوپ،
كوك اسپاننىڭ ءۇنى بوپ،
جۇرەكتەردى جىرعاتىپ،
جۇگىندىرىپ جىلاتىپ،
جەكە ءانىڭ تەربەتتى.
تابىندىرىپ ارلى ءۇنىڭ،
تانىتىپ شىن ءان كۇشىن،
بار ادامعا قيماس بوپ،
بار الەمگە ديماش بوپ،
جەلپي بەر انمەن جەر كوكتى.
كوكتى جاردى اسپاندا ءۇنىڭ ارقىراپ،
كورمەگەن جۇرت مۇنداي بۇرىن ءان تىڭداپ.
كوشتى تاسقىن كوكىرەكتەردەن لاقىلداپ،
كوكسەدى-اۋ كوڭىلىندە وت لاپىلداپ.
دامىلداپ از-اق بۇلتتى اسىپ تەكتى ءارلى ءۇن،
دالاڭنىڭ اق نوسەرىندەي توكتى ءانىڭ.
جەلپىندىرىپ، سىلكىندىرىپ جەر شارىن،
جەتى قۇرلىق قۇلاعىنا جەتتى ءانىڭ.
