ەل ورداسى استانادا ينجەنەرلەر مەن عالىمداردىڭ دۇنيەجۇزىلىك كونگرەسى باستالدى، دەپ حابارلايدى قامشى اقپاراتتىق اگەنتتىگى 24.kz-كە سىلتەمە جاساپ.

 ەحرو كورمەسى اياسىندا وتەتىن 2 كۇندىك شاراعا الەمنىڭ 50 ەلىنەن شەتەلدىك 300 عالىم استاناعا ارنايى ات باسىن بۇرىپ وتىر. تانىمال تۇلعالار قاتارىندا نوبەل سىيلىعىنىڭ لاۋرەتتارى دا بار.

WSEC – ينجەنەرلەر مەن عالىمداردىڭ دۇنيەجۇزىلىك كونگرەسى. ياعني قازىرگى عىلىم سالاسىنداعى كىل مىقتىلار باس قوساتىن جيىن. ال كونگرەستىڭ بيىلعى تاقىرىبى – بولاشاقتىڭ ەنەرگياسى: يننوۆاسيالىق سەنارييلەر مەن ونى ىسكە اسىرۋدىڭ تاسىلدەرى. مۇنداي تاقىرىپتىڭ تاڭدالۋى بەكەر ەمەس.

 ويتكەنى كونگرەسس EXPO كورمەسى اياسىندا وتكەلى وتىر. باسقوسۋدا ەنەرگەتيكا سالاسىنداعى ەڭ ۇزدىك جەتىستىكتەر مەن زاماناۋي باعىتتار تالقىلاناتىن بولادى. تاراپتار ەلەكتر قۋاتىن وندىرۋدە قورشاعان ورتاعا كەرى اسەرىن تيگىزبەيتىن تىڭ تەحنولوگيالارعا باسىمدىق بەرمەك. ايتىپ وتكەنىمىزدەي، كونگرەسس EXPO كورمەسى اياسىندا جوسپارلانعان ەڭ اۋقىمدى شارالاردىڭ ءبىرى سانالادى. حالىقارالىق كورمەدە كورسەتىلەتىن يننوۆاسيالىق تۋىندىلار مەن زاماناۋي عىلىم وكىلدەرىنىڭ ءبىر جەردە توعىسۋى سينەرگەتيكالىق ناتيجە بەرەرى ءسوزسىز.

ايتا كەتەيىك، بۇل كونگرەسس ورتالىق ازيا ەلدەرى اراسىندا العاش رەت وتكەلى تۇر. تورتكۇل دۇنيەنىڭ ءتورت بۇرىشىنداعى 50-دەن استام ەلدەن ءبىر مىڭ قاتىسۋشى استاناعا كەلدى. ولاردىڭ دەنى شەتەلدىك عالىمدار ەكەنىن اتاپ وتكەن ءجون. مارتەبەلى مەيماندار قاتارىندا نوبەل سىيلىعىنىڭ ءتورت لاۋرەاتى، «جاھاندىق ەنەرگيا» حالىقارالىق سىيلىعىنىڭ سەگىز لاۋرەاتى، تانىمال قازاقستاندىق جانە شەتەلدىك ەكولوگتار، ساراپشىلار بار. بۇل رەتتە كۋبا عىلىم اكادەمياسىنىڭ ۆيسە-پرەزيدەنتى فيدەل كاسترو دياس-بالارت ءقازىردىڭ وزىنەن كونگرەسس جۇمىسىنا ۇلكەن سەنىم ارتىپ وتىرعانىن ۇيىمداستىرۋشىلاردان ەستىدىك. 

شولۋشى: ايگەرىم تاۋباي