ءبىر مومىن ءوزى ورازالى ەكەن، جۇمىسىنان شىعىپ، كەشكىسىن ۇيىنە قاراي اسىعادى عوي. جولاي ەكى دوسى ۇشىراسا كەتەدى. ولاردىڭ دا اۋىزى بەكىتۋلى ەكەن. سودان دوستارىنا ۇيگە جۇرىڭىزدەر دەپ ايتىپ قالادى.
- بۇگىنگى اۋىزاشار مەنەن بولسىن دوستارىم. سەندەردى كورمەگەلى كوپ بولدى. كەلىڭدەر، كولىككە وتىرىڭدار، - دەپ شاقىردى.
- بولسا، بولسىن. ال باردىق شاقىرىپ تۇرعان سوڭ، "شاقىرعان جەردەن قالما" دەگەن، - دەپ ەكى دوسى شاقىرۋىن قوش الادى. ازدان سوڭ ءبىر قيىلىستا جانە تانىستارى جولىعادى. كورىسكەن سوڭ ولاردى تاستاپ كەتۋگە بولماي قالادى. وزدەرىنىڭ كولىگى بار. اۋىزاشارعا تۇرىك كافەسىنە شىققان بويلارى ەكەن. "ونى قايتەسىڭدەر، بىزبەن بىرگە جۇرىڭدەر!" دەيدى عوي بۇلار. ءسويتىپ ون ادام مۇنىڭ ۇيىنە كەلە جاتىر شاقىرعان سوڭ. ەندى بۇل ويلاپ كەلەدى. "ەكى دوسىم جارايدى. ال ولاردىڭ دا جولداستارىن جولدا قوسىپ العانىم قىزىق بولدى-اۋ ءوزى؟! ۇيدە ازىق-تۇلىك تە جوق ەدى عوي. قارا سۋ مەن قاتقان نان بولسا بولار... ايەلىم ءقازىر نە كۇيگە تۇسەر ەكەن؟.." - دەپ ىشتەي قاتتى قاپا بولادى. سودان ءبىر وڭتايلى تۇستا كولىگىن توقتاتىپ، وڭاشالانىپ تەلەفون شالادى. قىرسىققاندا قوڭىراۋى جەتپەيدى. قايتا-قايتا شالدى. بىرلىگى دە بىتكەن ەكەن. بارى "ماياكتاۋعا" جەتتى ايتەۋىر. ءبىراق ايەلىنەن سىبىس بولمادى. ءۇيى قالانىڭ شەتىندە بولاتىن. جەتكەنشە ءبىراز ۋاقىت الادى. ول اينالاسىنداعىلارعا سىر بەرمەۋگە تىرىستى. كولىگىن جايمەن ايداپ كەلەدى. ارتىندا تاعى ءبىر كولىك. سودان ءوزىنىڭ ويلانباي ىستەلگەن ارەكەتىنە ىشتەي كۇيىپ ۇيىنە دە ءبىر توپ قوناقپەن ساۋ ەتىپ كىرىپ كەلەدى. تابالدىرىقتان اتتاعاندا-اق مۇرىندارىنا ءدامدى استىڭ ءيىسى بۇرقىراي جەتىپ، اۋىزاشار ۋاقىتىنىڭ تاياعانىن سەزدىرىپ-اق جاتىر. قوناق بولمەگە ەنگەن ورازالى مەيماندار الۋان ءدام تولى مول داستارحاندى كورىپ، وزدەرىن اۋىزاشارعا شاقىرعان ءۇي يەسى مەن ونىڭ قولى شەبەر جۇبايىنا ريزا بولىپ جاتىر. ءبارى قۇرمامەن، سۋمەن اۋىز اشىپ، بىلەتىندەرى اقشام نامازىن وقىپ، قايتا داستارحان ماڭىنان تابىلىپ، ءبىر-بىرىن ساعىنىسقان تۋىستارداي ەمەن-جارقىن كۇيدە تاماقتانادى. الۋان جەمىس پەن قاربىز-قاۋىنعا شەيىن مەيماندوستىقتىڭ شىرايىن اشقان بۇل داستارحاننىڭ ورتايماۋىنا، ءۇي يەلەرىنىڭ باقىتتى بولا بەرۋلەرىنە باتا-تىلەگىن ارناعان قوناقتاردى شىعارىپ سالعاننان كەيىن كۇيەۋى شىداي الماي ايەلىن قۇشاقتاپ، بەتىنەن ءسۇيدى. 
- جارىق كۇنىم-اۋ، مەن ساعان ەسكەرتپەستەن ۇيگە ءبىر قاۋىم قوناق ىلەستىرىپ كەلدىم. ۇيدە تاماقتىڭ جوعىن، ونى الا قوياتىن قاراجاتىمىزدىڭ دا تۇگەسىلىپ قالعانىن بىلەمىن عوي. ءبىراق نەگە ەكەنىن قايدام، باسىندا تەك ەكى دوسىمدى شاقىرعام، جولشىباي ولاردىڭ دوستارى كەزدەسىپ، سودان وسىلاي بوپ قالدى. الايدا سەن ءبىزدى ارنايى ازىرلىكپەن قارسى الدىڭ عوي. وسىنشاما ريزىق قايدان پايدا بولدى؟!
- سەن "سمس" جازىپ جىبەرىپسىڭ عوي. "جانىمدا ون ادامىم بار، اۋىزاشارعا دايىن بول"دەپ. سودان مەن ساسقالاقتاپ قالدىم. سول ساتتە ءوزىم كىر جۋىپ جاتقان ەدىم. سەنىڭ انە ءبىر كوپتەن كيمەي ىلگىشتە قالعان كونە دجينسوۆىي جيدەڭنىڭ قالتاسىن اينالدىرىپ جاتقانىمدا ىشىنەن شيىرشىقتالعان ەداۋىر اقشا شىقتى. سۋ تيگەنمەن جىرتىلماعان. سەنىڭ ۇمىتشاقتىعىڭا كۇلىپ السام دا، ەشكىمگە قارىز بولماي ءوز اقشامىز وزىمىزگە ولجا بولعانىنا قۋانىپ، بىردەن ىسكە كىرىستىم. ساعان قايتارا تەلەفون شالۋعا دا مۇرشام بولماي قالدى عوي. دىمقىل تارتقان اقشانى ۇتكىپەن كەپتىرىپ، دۇكەنگە شاپتىم. ۇلگەردىم. اقشا دا تۋرا جەتتى. تيىن-تەبەن قالدى دا،-دەپ كۇلىمسىرەدى سۇيىكتى جار ودان سايىن سۇيكىمدىلەنىپ.
- ە، قىزىق ەكەن. ونداي ۇمىتشاق ەمەس ەدىم...
- ءيا، ۇمىتشاق ەمەسسىڭ! تالاي رەت كيىمدەرىڭنىڭ قالتاسىنان 200-دىك تەڭگە شىعاتىن ەدى عوي، بۇل جولى كادىمگىدەي! ەگەر ول اقشا بولماعاندا، وندا بىلمەيمىن نە قىلارىمدى. قارا سۋ قوياتىن بولارمىن ءار قوناقتىڭ الدىنا...-دەپ زايىبى جىميىپ، ەرىنە ەركەلەي قارادى. ەرى بولسا ءوزىنىڭ ۇمىتشاقتىعىنىڭ دا ءبىر پايداسى تيگەنىنە ءالى قايران. سوسىن ايەلىنىڭ تەلەفونىن الىپ، كەلگەن حاتتى اشىپ وقىدى، وندا: "سىزگە ****** مىنا ءنومىر ون رەت تەلەفون شالدى" دەگەن جازۋ عانا تۇر ەكەن. ەرلى-زايىپتىلار بىر-بىرىنە قاراپ كۇلىمدەپ، ءۇيدىڭ ءىشىن مەيىرىم شۋاعىنا بولەدى. 
-"ون قايتارا تەلەفون شالدى" دەگەندى سەنىڭ قالاي وقىعانىڭدى بىلمەيمىن، ءبىراق تۋرا تۇسىنگەنىڭە وتە ريزامىن، جانىم! ال مەن الگى اقشانى وسى كۇن ءۇشىن ۇمىتقانمىن عو شاماسى. سولاي بۇيىرمىس، قىزىق،-دەپ ەرى جارىن قۇشاقتاپ، ماڭدايىنان يىسكەدى. سۇيىكتى جارى دا ەركەلەي ءۇن قاتىپ، سىڭعىرلاي كۇلىپ، ازاماتىن ۇياتقا قالدىرماعانىنا شۇكىرشىلىك ەتىپ جاتتى. وسى ساتتەردە باقىتتى شاڭىراقتىڭ توبەسىندە سان مىڭ جۇلدىزدار جىمىڭداپ، پەرىشتەلەر اللاعا ماداق ءانىن شىرقاپ جاتتى. مەشىتتە تاراۋىح ءۇنى تەربەلىپ، دۇنيە نۇرعا شومعان. جاراتقان اللا وزىنە تاۋەكەل ەتكەن قۇلىن جالعىز تاستامايدى عوي! بۇل ەرلى-زايىپتىلار كۇندە اللانى اۋىزدارىنان تاستاماۋشى ەدى..."قۇدايسىز قۋراي باسى سىنبايدى" دەپ وتىرۋشى ەدى ءبىز بىلەتىن باياعىنىڭ سارى ءتىستى كەمپىر-شالدارى، سول راس...

مۇنايدار بالمولدا