سەنات دەپۋتاتى، قارجى جانە بيۋدجەت جونىندەگى كوميتەتتىڭ مۇشەسى سەرگەي ەرشوۆ قازاقستاننىڭ 2050 جىلى الەمنىڭ دامىعان 30 مەملەكەتىنىڭ قاتارىنا ەنەتىنىنە كۇمان كەلتىردى، - دەپ حابارلايدى Tengrinews.kz.  "2016 جىلى مەملەكەتتىك ورگانداردىڭ ستراتەگيالىق جوسپارى بولىپ بەكىتىلگەن 479 ارناۋلى ينديكاتوردىڭ 372-سىنە عانا نەمەسە 78 پايىزىنا عانا قول جەتكىزدىك. ارناۋلى ينديكاتورلاردىڭ 83ء-ى دەف باسەكەگە قابىلەتتىلىك جاھاندىق يندەكسىنىڭ ينديكاتورى بولىپ سانالادى، ونىڭ 39 پايىزى عانا ورىندالعان. اسا نازار قويىپ ايتا كەتكىم كەلەتىنى، دەف مەملەكەتتەردىڭ باسەكەگە قابىلەتتىلىگىنىڭ جاھاندىق رەيتينگىن جۇرگىزەدى، ال مەملەكەت باسشىسى قازاقستان 2050 جىلى دامىعان 30 ەلدىڭ قاتارىنا كىرۋى كەرەك ەكەنىن ناقتى ايتتى. بۇل جاعدايدا وسى مەرزىمگە تاپسىرامانىڭ بارلىعىن ورىنداي الاتىنىمىزعا كۇمان كوپ"، - دەدى سەناتور پارلامەنت پالاتالارىنىڭ بىرىككەن وتىرىسىندا 2016 جىلدىڭ رەسپۋبليكالىق بيۋدجەتىنىڭ ورىندالۋىن تالقىلاۋ بارىسىندا. 

ەرشوۆ مۇنداي جاعدايلاردى بولدىرماۋ ءۇشىن ۇكىمەتتىڭ قاجەتتى شارالاردى قابىلداۋى كەرەك ەكەنىن ايتىپ ءوتتى. سول شارالاردىڭ ءبىرى ءاربىر ينديكاتور بويىنشا ورىنداۋعا جەكە جاۋاپكەرشىلىكتى بەكىتۋ، سونداي-اق، ولاردىڭ وزەكتىلىگىن، ادىلدىگىن جانە جۇزەگە اسىرىلۋىن انىقتاۋ.  "بيۋدجەت باعدارلامالارى بيۋدجەت قاراجاتىن يگەرۋدى سيپاتتايدى. الايدا بيۋدجەت ناۋرىزدا جانە قازاندا ەكى رەت ناقتىلانسا، يگەرۋدىڭ ساپاسىنا باعا بەرۋ قيىن. رەسپۋبليكالىق بيۋدجەتتى ىسكە اسىرۋعا قابىلدانعان ۇكىمەت قاۋلىسى 31 رەت وزگەردى. 17 وزگەرىس ءتورتىنشى توقساندا بولدى. ءبىر كۇنتىزبەلىك مەرزىمگە وزگەرىس ەنگىزۋ تۋرالى 2-3 قاۋلىدان كەلەدى. ەسەپ كوميتەتىنىڭ پىكىرىمەن كەلىسەمىز، ولار مۇنداي دەرەكتەردىڭ رەسپۋبليكالىق بيۋدجەتتى ىسكە اسىرۋ پروسەسىن ايتارلىقتاي قيىنداتىپ وتىر دەپ ۇكىمەت قاۋلىسىن تۇزەتۋگە جۇيەلى تالقىلاۋدىڭ جوقتىعىن ايتقان"، - دەدى ەرشوۆ. 

بۇعان قاراماستان، سەناتوردىڭ ايتۋىنشا، پارامەترلەر تۇزەتىلگەننەن كەيىن بيۋدجەت قاراجاتىن ورىنداۋ 100 پايىزعا جەتپەگەن - 99،1 پايىزعا نەمەسە 8،8 تريلليون تەڭگەگە ورىندالعان. "2015 جىلمەن سالىستىرعاندا تابىس 25 پايىزعا ءوستى، بۇعان نە سەبەپ؟ ساراپتامادان تابىستىڭ وسۋىنە ۇلتتىق ۆاليۋتانىڭ ديەۆالۆاسياسىنىڭ ءرولى باسىم بولعانىن انىقاپ وتىرمىز"، - دەيدى ول.  سەناتور بيۋدجەت قاراجاتىنىڭ يگەرىلمەگەن ايتارلىقتاي سوماسى، بىرىنشىدەن، شىعىندى ەگجەي-تەگجەيلى جوسپارلاۋدى، ەكىنشىدەن، بيۋدجەتتىڭ جوسپارلى كورسەتكىشتەرىن جاۋاپكەرشىلىكپەن ورىنداۋدى تالاپ ەتەتىنىن كورسەتكەن.  مۇنىمەن قاتار، ەرشوۆ مەملەكەتتىك ساتىپ الۋ سالاسىنداعى كىلتيپانداردى اتاپ ءوتىپ، بۇل سالادا 2 ميلليارد تەڭگە شىعىن بولعانىن ناقتىلادى. "بۇل دەرەكتەر وسى سالادا ءتارتىپتىڭ جوقتىعىن، نورماتيۆتىك-قۇقىقتىق بازانىڭ ءالسىز ءارى ونى ابدەن پىسىقتاۋ كەرەك ەكەنىن كورسەتتى. ۇكىمەتتىڭ وسى جاعدايدى تۇزەۋ بويىنشا قابىلداپ وتىرعان شارالارىنان ءالى كۇنگە جاعىمدى اسەر بولمادى"، - دەپ قورىتىندىلادى سەناتور ويىن.   ول مەملەكەتتىك سىڭايلى سەكتوردىڭ قىزمەتىن باعالاۋدىڭ ءبىرىڭعاي شارتتارى جايىندا ايتتى. ايتۋىنشا، بۇل شارتتار وسى سالاداعى شىنايى جاعدايدى كورسەتىپ وتىر. "مەملەكەت مەملەكەتتىك سىڭايلى سەكتورعا ءتيىمدى باسقارۋشى رەتىندە زور ءۇمىت ارتىپ وتىر، الايدا، ءبىزدىڭ ويىمىزشا، بۇل ءۇمىت اقتالماي وتىر"، - دەيدى ەرشوۆ.  سەناتور وسى ەسكەرتۋلەردى ايتا كەلە ۇكىمەت پەن ەسەپ كوميتەتىنىڭ جاۋابىن قولداپ، 2016 جىلعى رەسپۋبليكالىق بيۋدجەتىن بەكىتۋدى ۇسىندى.