ۇلتتىق ۇلان ساربازدارى رولان تىشقانباي مەن اسىلجان ايتباي كاسىپكەردىڭ 5 ميلليون تەڭگەسىن قايتارىپ بەردى دەپ حابارلايدى قامشى اقپاراتتىق اگەنتتىگى Sputnik-كە سىلتەمە جاساي وتىرىپ.

15 ماۋسىم كۇنى 5573 اسكەري ءبولىمىنىڭ جاساعى استانا قالاسى قابانباي داڭعىل كوشەسىنىڭ بويىنان (“تريۋمف” تۇرعىن ءۇي كەشەنى تۇسىنان) ءاميان تاۋىپ الادى. ءامياننىڭ ىشىندە 20-25 دانا ەۆرو كۋپيۋراسى (ءتول ۆاليۋتاعا شاققاندا 5 ميلليون تەڭگەگە جۋىق) بار ەكەن. اسكەري جاساق قۇرامى رولان تىشقانباي مەن اسىلجان ايتباي وسى جايت تۋرالى دەرەۋ اسكەري جاساق كەزەكشىسى لەيتەنانت نۇرسۇلتان امىروۆكە، ءىىد قىزمەتكەرلەرىنە باياندايدى. قۇقىق قورعاۋشىلار ءاميان يەسىن ىزدەستىرۋگە شۇعىل كىرىسىپ كەتەدى.

“سنەجنىي بارس” جەكە كاسىپكەرلىگىنىڭ ديرەكتورى حاميت حايرۋللين مىرزا وسى ۋاقىتتا قوماقتى اقشاسى جوعالعانى جونىندە قۇقىق قورعاۋ پۋنكتىنە ءوتىنىش جازعان. كوپ ۇزاماي اسكەري جاساقپەن كەزدەسىپ، ءاميانىن قايتارىپ العان كاسىپكەر ۇلاندىق جاۋىنگەرلەرگە جەدەل كومەگى، ادالدىعى مەن تاربيەسى ءۇشىن العىس ءبىلدىردى. ق ر ۇلتتىق ۇلاننىڭ باسپا ءسوز قىزمەتى حابارلاعانداي، قۇراما كومانديرى پولكوۆنيك ساكەنتاي شەكاربەكوۆتىڭ بۇيرىعىمەن رولان تىشقانباي مەن اسىلجان ايتباي ۇلگىلى قىزمەتى ءۇشىن “قوعامدىق ءتارتىپتى ساقتاعانى ءۇشىن” كەۋدە بەلگىسىمەن ماراپاتتالدى.

سونداي-اق، ساربازداردىڭ ۆزۆود جانە روتا كومانديرلەرى دە جەكە قۇراممەن تاربيە جۇمىسىن دۇرىس جۇرگىزگەنى ءۇشىن ۇلتتىق ۇلان سيمۆوليكاسى بەينەلەنگەن ساعاتتارمەن ماراپاتتالدى.

ال بۇگىن ۇلتتىق ۇلاننىڭ استانالىق جەدەل ماقساتتاعى بريگاداسىنىڭ بازاسىندا قىزمەت بارىسىندا ادالدىعىمەن كوزگە تۇسكەن جاۋىنگەرلەردى قۇرمەتتەۋ كەشى وتەدى.

شولۋشى: اسەل وتەشوۆا