قورعانىس جانە اەروعارىش ونەركاسىبى ءمينيسترى بەيبىت اتامقۇلوۆ قاراعاندى وبلىسىندا زىمىران قۇلاعاننان كەيىن شىققان ءورت ءۇشىن رەسەيدىڭ وتەماقى تولەمەيتىنىن ايتتى، - دەپ حابارلايدى قامشى اپاراتتىق اگەنتتىگى Tengrinews.kz سايتىنا سىلتەمە جاساپ.

"ءورتتى سوندىرۋگە باعىتتالعان جۇمىستاردىڭ بارلىعى جاسالدى. سىزدەر مۇنداي جاعدايلاردىڭ جىلىنا 2-3 رەت بولاتىنىن ەسكەرمەي وتىرسىزدار. ونىمەن قوسا، ءورت شولەيتتى اۋماقتا بولدى، كۇن وتە ىستىق. ءورتتى سوندىرۋگە قاتىستى شارالارعا كەتكەن شىعىندى رەسەيلىك تاراپ الدى. ولار بارلىق شىعىندى تولىقتاي جاپتى"، - دەدى مينيستر.

اتامقۇلوۆتىڭ ايتۋىنشا، قازاقستان ءورت ءۇشىن وتەماقى تالاپ ەتپەيدى.

"ول جاقتا تەك ءشوپ ورتەنىپ كەتتى"، - دەدى مينيستر.

بەيبىت اتامقۇلوۆ توتەنشە جاعدايدان قازا تاپقان ەر ادامنىڭ وتباسىنا جانە زارداپ شەككەندەرگە قانداي وتەماقى بەرىلەتىنىن ناقتىلامادى. 

"روسكوسموس" وكىلدەرى كورسەتەتىن كومەكتىڭ سوماسى ازىرشە تالقىلانىپ جاتىر، ونى ايتا المايمىن. ول رەسەي فەدەراسياسىنىڭ بيۋدجەتى عوي. كومەكتىڭ بارلىعىن رەسەيلىك تاراپ كورسەتەدى، سەبەبى قازا تاپقان ەر ادام رەسەيلىك كاسىپورىننىڭ جۇمىسشىسى بولىپ سانالادى. سول جاقتان جالاقى الىپ ءجۇردى، ساقتاندىرۋى جانە تاعى باسقاسى"، - دەدى مينيستر.

ەسكە سالا كەتەيىك، 14 ماۋسىمدا  كەشكى ۋاقىتتا قولدانۋشىلار WhatsApp مەسسەندجەرى ارقىلى جەزقازعان ماڭىنداعى تالاپ اۋىلىنا زىمىران قۇلاعانى تۋرالى حابار تاراتقان بولاتىن. حابارلامادا قيراندىدا گەپتيل (ادام ومىرىنە وتە ءقاۋىپتى حيميالىق ۋلى زات) بار دەلىندى. اۋىل تۇرعىندارىنا ەسىك پەن تەرەزەلەردى جابۋ كەرەكتىگى جانە بالالاردى كوشەگە شىعارماۋ تۋرالى ەسكەرتۋ جاسالعان بولاتىن. سونداي-اق، وسىعان دەيىن جەزقازعان ماڭىنا قۇلاعان زىمىران قيراندىسىندا قاتەرلى گەپتيل جوق ەكەنى ايتىلعان ەدى. 

سونىمەن قاتار،  زىمىران قيراندىسى قۇلاعان جەردە ءبىر ادامنىڭ قازا تاپقانى جايلى حابارلانعان بولاتىن. ال كەيىنىرەك روسكوسموس جەزقازعان ماڭىنداعى قايعىلى وقيعاعا بايلانىستى پىكىر بىلدىرگەن ەدى. ولاردىڭ ايتۋىنشا، ورتكە قاتتى سوققان جەل سەبەپ بولعان. "اۋىر مەتەوجاعدايلارعا بايلانىستى حالىق تۇرمايتىن اۋماقتا ءورت شىقتى. ادامدارعا ەش ءقاۋىپ ءتونىپ تۇرعان جوق، ءورت ءسوندىرىلدى"، - دەگەن ەدى روسكوسموس وكىلدەرى.