ەكونوميست ارمان بايعانوۆ كريپتوۆاليۋتانىڭ قازاقستانداعى ماڭىزى مەن ونىڭ ەلىمىزگە قاجەتتىلىگى تۋرالى پىكىرىمەن ءبولىستى، دەپ حابارلايدى قامشى اقپاراتتىق اگەنتتىگى Sputnik.kz سايتىنا سىلتەمە جاساپ.
قازاقستان پرەزيدەنتى نۇرسۇلتان نازاربايەۆ ۆاليۋتالىق داعدارىسقا "بىرەگەي جاۋاپ" رەتىندە كريپتوۆاليۋتانى اتادى. Astana Best Consulting Group ەكونوميستى ارمان بايعانوۆ مەملەكەت باسشىسىمەن كەلىسەدى، الايدا ۆيرتۋالدى ۆاليۋتاعا ءوتۋ پروسەسىن ۇزاق ءارى بەينەتتى بولادى دەپ ەسەپتەيدى. كريپتوۆاليۋتا – بۇل قولدان جاساۋدان تولىق قورعالعان جانە ابستراكتىلى سەنىمگە ەمەس، ناقتى اكتيۆتەرمەن قامتاماسىز ەتۋگە نەگىزدەلگەن ۆيرتۋالدى ۆاليۋتا. استانا ەكونوميكالىق فورۋمنىڭ جابىلۋ سالتاناتىندا ءسوز العان ەل پرەزيدەنتى "بۇل اقشا دەموكراتيالىق، ياعني بۇكىل دۇنيەجۇزىنىڭ تۇتىنۋشىلارىمەن قابىلدانۋى ءتيىس، سوندىقتان بۇل ىستە مەملەكەتتەر بارىنشا كوپتەپ قاتىسقاندارى ءجون"، دەپ اتاپ وتكەن.
راسىندا، الەمدىك ەكونوميكانىڭ "سانعا" كىرىپ كەتكەنىنە ءبىراز بولدى. ۆيرتۋالدى بيتكوين مەن ونىڭ كوپتەگەن تۋىستارىنىڭ سەنىمدىلىگى مەن باقىلانباۋىنا قاتىستى ماسەلە بۇكىل الەمدە قىزۋ تالقىلانىپ جاتىر.
كەيبىر ساراپشىلاردىڭ پىكىرىنشە، كريپتوۆاليۋتا – ساناسپاۋعا بولمايتىن فاكت، بۇل رەتتە ودان بۇكىل ۆاليۋتالىق داعدارىستان قۇتقاراتىن پاناسەيانى كورەدى، ال وزگەلەر كەرىسىنشە سەنبەيدى جانە ۆيرتۋالدى ۆاليۋتادان "اۋلاق جۇرۋگە" كەڭەس بەرەدى. ال ەندى ءبىر ساراپشىلار ۆيرتۋالدى ۆاليۋتانىڭ بۇگىن بولماسا ەرتەڭ قولدانىسقا ەنەتىنىنە سەنىمدى. "كريپتوۆاليۋتا ەنگىزۋگە ساقتىقپەن قاراۋ كەرەك، — دەپ سانايدى بايعانوۆ. – الەمدە ءقازىر ءارتۇرلى كريپتوۆاليۋتا بار، ولاردىڭ اراسىندا ەڭ كەڭ تارالعانى – "بيتكوين". ۆاليۋتانىڭ بۇل ءتۇرى ەشكىممەن رەتتەلمەيدى جانە ەشتەڭەمەن قامتاماسىز ەتىلمەگەن. ياعني ونىڭ باعاسى نارىققا قاتىسۋشىلاردىڭ بۇل اكتيۆكە دەگەن سەنىمدىلىگىنەن شىعادى. بۇل اتىشۋلى ممم قارجى پيراميداسى سەكىلدى: باعاسى بىردەن ءوسىپ كەتۋى مۇمكىن، سونداي-اق كەنەتتەن ءتۇسىپ كەتۋى دە مۇمكىن".
ساراپشىنىڭ تۇسىندىرۋىنشە، ارەكەتتەگى كريپتوۆاليۋتالاردىڭ كوتيروۆكالارى قاتتى قۇبىلمالى بولىپ تابىلادى، سوندىقتان قارجىلىق تاۋەكەلدىلىگى جوعارى جانە تابيعاتى بويىنشا كوبىنە ساۋداگەرلىككە كەلەدى.
سونداي-اق ۆيرتۋالدى ۆاليۋتالار ءارتۇرلى مانيپۋلياسيالار مەن حاكەرلىك شابۋىلداردان ساقتاندىرىلماعان. "ەگەر قازاقستاندا ەنگىزۋ تۋرالى ايتار بولساق، ول قولما قول اقشا اينالىمىنان باس تارتۋدى بىلدىرەدى، بۇل رەتتە ارەكەتتەگى بلوكچەين جۇيەسىنىڭ تاجىريبەسىن پايدالانۋ"، — دەي كەلە بايعانوۆ ءقازىر رەسەي ورتالىق بانكى جاساپ جاتقانداي ءوز ەلىندە ۆيرتۋالدى ۆاليۋتا جاساپ كورۋ قاجەت دەگەن پىكىر بىلدىرەدى. "كريپتوۆاليۋتانىڭ قىزمەت ەتۋ جۇيەسىنىڭ ءوزى ۇلتتىق بانك تاراپىنان رەتتەلۋگە ءتيىس، سونىمەن بىرگە ارينە التىنمەن جانە قازاقستان ەكونوميكاسىمەن قامتاماسىز ەتىلۋى قاجەت. بلوكچەين جۇيەسىن ەنگىزۋدە اقپاراتتىق قاۋىپسىزدىكتى قامتاماسىز ەتۋگە نازار اۋدارۋ قاجەت"، — دەپ ەسەپتەيدى ەكونوميست. جالپى، ونىڭ پىكىرىنشە، بلوكچەين نەگىزىندە كريپتوۆاليۋتا ەنگىزۋمەن قولما قولسىز اقشا اينالىمىنا ءوتۋ قارجى اعىندارىن اشىق ەتىپ، جەمقورلىق پەن كولەڭكەلى ەكونوميكانى جويۋعا كومەكتەسەدى. ءبىراق بىردەن ەمەس.
