ورتالىق كوممۋنيكاسيالار قىزمەتىندە ق ر پرەزيدەنتىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىن ىسكە اسىرۋ تۇرعىسىنان «بولاشاق» ستيپەندياسىن جاڭعىرتۋعا ارنالعان باسپا ءسوز كونفەرەنسيا ءوتتى.

ءىس-شاراعا «حالىقارالىق باعدارلامالار ورتالىعى» اق ۆيسە-پرەزيدەنتى مەيىرجان الپىسباي، «حالىقارالىق باعدارلامالار ورتالىعى» اق ۆيسە-پرەزيدەنتى زۋلفيا تورەبەكوۆا جانە كونكۋرستىق راسىمدەردى ۇيىمداستىرۋ دەپارتامەنتىنىڭ ديرەكتورى ايمان اۋباكىروۆا قاتىستى.

مەيىرجان الپىسباي اتاپ وتكەندەي، جاڭا ەكونوميكالىق ساياسات پەن مەملەكەتتى جاڭعىرتۋ باسىمدىقتارى جاعدايىندا قازاقستان ءۇشىن ەلدىڭ ساپالى الەۋەتىن ارتتىرۋ جانە ءتيىمدى كاسىبي رەسۋرستى قالىپتاستىرۋ ەرەكشە ماڭىزعا يە. وسىعان بايلانىستى، «بولاشاق» حالىقارالىق ستيپەندياسى ارقىلى وزىق تاجىريبە مەن ۇزدىك ۇلگى الۋ رەسپۋبليكادا باستالعان جاڭعىرتۋدىڭ ءۇشىنشى تولقىنى تۇرعىسىنان دا باسىم بولىپ قالاتىنىن مەكەمە باسشىسى اتاپ ءوتتى. 

 «بولاشاق» حالىقارالىق ستيپەندياسى ءبىلىم بەرۋ سالىسىنداعى قازاقستاندىق العاشقى سەرپىلىستى جوبالاردىڭ ءبىرى بولىپ، كاسىبي مامانداردى دايارلاۋ جۇيەسى رەتىندە ەلدىڭ كادرلارداعى ءوسىپ كەلە جاتقان قاجەتتىلىكتەرىنە تولىق بەيىمدەلۋگە ۇمتىلۋدا. باعدارلاما ماڭىزى «100 ناقتى قادام» ۇلت جوسپارىنىڭ ينستيتۋتتىق رەفورمالارى، ەلدىڭ  يندۋستريالدى-يننوۆاسيالىق دامۋى جانە مەملەكەت باسشىسىنىڭ «جاڭعىرتۋ 3.0» جولداۋىندا بەلگىلەنگەن «ادامي كاپيتال ساپاسىن جاقسارتۋ» بويىنشا مىندەتتەر اياسىندا نىعايادى، – دەپ اتاپ ءوتتى «حالىقارالىق باعدارلامالار ورتالىعى» اق ۆيسە-پرەزيدەنتى مەيىرجان الپىسباي. 

«حالىقارالىق باعدارلامالار ورتالىعى» اق ۆيسە-پرەزيدەنتى زۋلفيا تورەبەكوۆا 23 مامىردا قازاقستان رەسپۋبليكاسى ۇكىمەتىنىڭ قاۋلىسىمەن «بولاشاق» ستيپەندياسىنا ۇمىتكەرلەردى ىرىكتەۋدىڭ جاڭا قاعيدالارى قابىلدانىپ، سونداي-اق كونكۋرستىق ىرىكتەۋ راسىمىنە وزگەرىستەر ەنگىزىلگەندىگىن تىلگە تيەك ەتتى.

«ءبىرىنشى. IELTS 6.5 جانە ودان جوعارى سەرتيفيكاتى، سونداي-اق GPA 3.3 جانە ودان جوعارى ديپلومى بار تۇلعالار ءۇشىن «جالپى كونكۋرس» جاڭا ساناتى ەنگىزىلدى. ۇمىتكەرلەردىڭ وسى ساناتى ءۇشىن جۇمىس ءوتىلى مەن جۇمىس بەرۋشى ءوتىنىمىنىڭ بولۋىنا تالاپ قويىلمايدى. وسى سانات ماگيستر دارەجەسىن الۋ ءۇشىن ستيپەندياتتاردىڭ باسقا ساناتتارىمەن قاتار، 2 ايعا دەيىنگى مەرزىمدە وقۋ الدىنداعى دايارلىقتان (pre-master's) ءوتۋ مۇمكىندىگىن بەرەدى. ەكىنشى. اكادەميالىق باعدارلامالار (ماگيستراتۋرا، دوكتورانتۋرا، رەزيدەنتۋرا) ءۇشىن ۇمىتكەرلەردىڭ بارلىق ساناتتارىنا باكالاۆر نەمەسە مامان ديپلومىنىڭ ورتاشا بالىنا قويىلاتىن تالاپتار 3.0-دەن 3.3 (4.0/4.33-تەن) GPA دەڭگەيىنە دەيىن وزگەرتىلدى. ءۇشىنشى. «ماگيستراتۋرا» باعدارلاماسى بويىنشا ۇمىتكەرلەردىڭ بارلىق ۇلەستىك ساناتتارى ءۇشىن اعىلشىن ءتىلىن مەڭگەرۋ دەڭگەيىنىڭ ولشەمشارتتارى IELTS جۇيەسى بويىنشا 5.0 بالدان 5.5 بالعا دەيىن كوتەرىلدى. سونىمەن، «ينجەنەرلىك-تەحنيكالىق ماماندىق» ساناتى بويىنشا ۇمىتكەرلەرگە قويىلاتىن تالاپتار بۇرىنعى دەڭگەيدە – IELTS 5.0 قالادى»، - دەدى ول.

سونىمەن قاتار سپيكەر، ستيپەنديا تاعايىنداۋ ءۇشىن 2017 جىلدان باستاپ كونكۋرس 6 كەزەڭنەن تۇراتىنىن جەتكىزدى.