اقتوبەلىك دارىگەرلەر اۋرۋحانادا قايتىس بولعان جىگىتتىڭ ىشكى اعزاسىن تۋىستارىنىڭ رۇقساتىنسىز العان  دەپ جازادى ktk.kz. قوس بۇيرەگىن سول بويدا ەكى ناۋقاسقا سالىپ بەرىپتى. ال مارقۇمنىڭ جاقىندارى مۇنى ءمايىتحانادان سۇيەكتى الار كەزدە ءبىر-اق بىلگەن. ەندى ولار سۇيەكتى سۇراۋسىز قولداندى دەپ دارىگەرلەردى سوتقا بەرىپ جاتىر. وبلىستىڭ دەنساۋلىق ساقتاۋ باسقارماسىنىڭ دا ءوز ءۋاجى بار.  توبەلەستەن باسىنان سوققى العان 22 جاستاعى سەرىكبولسىن كوشەرباي وسىدان ەكى اپتا بۇرىن ەسىن جيماستان اۋرۋحانادا كوز جۇمعان. ول وبلىس ورتالىعىنا بايعانين اۋدانىنان ەكەن.

دەگەنمەن، ەش قايران بولماپتى. كەيىن قىرشىننىڭ قازاسىنا قايعىرعان جاقىندارىنا ءمايىتحانا قىزمەتكەرلەرى جەتكىزگەن حابار توبەلەرىنەن جاي تۇسىرگەندەي بولدى. ويتكەنى مارقۇمنىڭ تۋىستارىنىڭ رۇقساتىنسىز دارىگەرلەر ميى ءولىپ، ەسسىز جاتقان جىگىتتىڭ ىشكى اعزاسىن سويىپ العان. مۇنى ەستىگەن سەرىكبولسىننىڭ اناسى ءقازىر توسەك تارتىپ قالىپتى. ال تۋىستارى ونى سويىپ تاستايىنداي سۇراۋى جوق پا ەدى دەپ دارىگەرلەرگە اشىنىپ وتىر. اقتوبەلىك اق حالاتتىلار بولسا، جىگىتتىڭ قوس بۇيرەگىن باسقا ناۋقاستارعا سالىپ ۇلگەرگەن.  "تۋمالارى بار عوي قاسىندا. ەڭ بولماسا بىرەۋىنە ايتىپ، سۇراۋ كەرەك ەدى. ونداي ەشتەڭە ايتپاعان. سىرتتان ەستىپ وتىر عوي بۇلار"، - دەدى مارقۇمنىڭ ناعاشى اپاسى گۇلايىم ەسەنبايەۆا. دارىگەرلەر سەرىكبولسىن ەس-تۇسسىز اۋرۋحانادا جاتقان كەزىندە ميىنىڭ ولگەنىن تۋىستارىنا ايتقان ەكەن. ءبىراق ونى اپاراتتان اجىراتاردا اعزاسىن بىرەۋگە بەرەتىندەرى تۋرالى اۋىز اشپاپتى. سوندىقتان ادۆوكاتتار دا مۇنى ورەسكەل زاڭ بۇزۋشىلىق دەپ وتىر.

"حالىقتىڭ دەنساۋلىعى جانە دەنساۋلىق ساقتاۋ تۋرالى" زاڭنىڭ 169 بابىندا كورسەتىلگەن: "ءمايىتتىڭ ىشكى ورگاندارىن الۋ ءۇشىن ونىڭ جاقىندارىنىڭ، زاڭدى وكىلدەرىنىڭ رۇقساتى قاجەت". بۇل جەردە ەندى دەنساۋلىق ساقتاۋ ماماندارى مەنىڭشە دۇرىس جاساماعان دەپ ويلايمىن"، - دەپ پىكىر ءبىلدىردى بۇل جاعدايعا ادۆوكات قاتارباي رايسوۆ. ال دەنساۋلىق ساقتاۋ باسقارماسىنداعىلار باسقا دايەك كەلتىردى. ايتۋلارىنشا، مايىتتەن اعزانى الۋعا ەشكىمنىڭ رۇقساتى قاجەت ەمەس. ويتكەنى، بيىلدان باستاپ كۇشىنە ەنگەن جاڭا زاڭدا سولاي جازىلىپتى. "كوز جۇمعان مارقۇم  ءتىرى كەزىندە مەن دونور بولمايمىن دەپ قاعاز قالدىرماسا  دا، ءبىز زاڭدى تۇردە كەز كەلگەن ادامنان كەسىپ الامىز.  ەگەر مۇشەسى ساۋ بولسا ارينە.  سۇراۋسىز الىپ مۇقتاج ادامدارعا بەرىپ  وپەراسيا جاسايمىز"، - دەدى اقتوبە وبلىستىق دەنساۋلىق ساقتاۋ باسقارماسىنىڭ باسشىسى اسەت قالييەۆ. 

ءقازىر وسى وقيعاعا بايلانىستى قارالى وتباسى پروكۋراتۋرا مەن ىشكى ىستەر دەپارتامەنتىنە ارىز جازعان. سونداي-اق تۋىستارىنان رۇقسات العانى تۋرالى حابار تاراتقان جەرگىلىكتى گازەتتى دە سوتقا بەرىپتى. ەسكە سالسايى، ترانسپلانتولوگيانى دامىتۋعا قاتىستى زاڭ جوباسىن ازىرلەۋگە بەلگىلى دارىگەر، بۇرىنعى دەنساۋلىق ساقتاۋ ءمينيسترى جاقسىلىق دوسقالييەۆ جەتەكشىلىك ەتكەن بولاتىن. ەندى وسى داۋدان سوڭ ونىڭ ءوزى اقتوبەگە ارنايى كەلىپ، ءتۇسىندىرۋ جۇمىستارىن جۇرگىزبەكشى.

شولۋشى: نازەركە مۇسا