رەسەي باق-تارى قازاقستان اسكەرىن سيرياداعى سوعىس الاڭىنا جىبەرۋدى سۇراعانى جونىندە اقپارات تاراتقانى حابارلانعان. وسى ماسەلە بويىنشا ق ر ءماجىلىس دەپۋتاتى، حالىقارالىق ىستەر، قاۋىپسىزدىك جانە قورعانىس جونىندەگى كوميتەت ءتوراعاسى ماۋلەن اشىمبايەۆ «ساياسات» پورتالىنا بەرگەن سۇحباتىندا «قازاقستاننان اسكەر جىبەرىلەگىننىڭ وزىندە، ولار قانداي دا ءبىر تاراپتىڭ اتىنان شىقپايتىن بولادى»، دەدى.
سونداي-اق، ماۋلەن ساعاتحانۇلىنان رەسەيلىكتەردىڭ ق ر قارۋلى كۇشتەرىنىڭ سيريا سوعىسىنا اتتانۋىن قالايتىنى جونىندە سۇراستىرعاندا، دەپۋتات مۇنداي اقپاردان حابارسىز ەكەندەرىن جەتكىزدى.
«ەگەر قازاقستان اسكەرى سيرياعا اتتانسا، ولار قانداي دا ءبىر تاراپتى قولدامايتىنىن، ۇرىس الاڭىن شەشۋدە ەمەس، بۇۇ قامقورلىعىمەن وتكىزىلگەن بەيبىت تۇردەگى ميسسيالارعا اتسالىساتىن بولادى. ال قازاقستاندىق اسكەردى سوعىس الاڭىنا جىبەرۋ تۋرالى شەشىم جوسپاردا جوق. ول ءتىپتى قاراستىرىلمايدى دا. قاراستىرىلاتىن بولسا، زاڭناماعا سايكەس ءبىز قازاقستان جاۋىنگەرلەرىن سيرياعا بۇۇ شەشىمىمەن بىتىمگە كەلۋ ماقساتىندا جىبەرەمىز.
اقپاراتتى تۇپكىلىكتى زەردەلەۋ قاجەت. مۇنداي اقپاراتتىڭ تارالۋىن ءوز باسىم دۇرىس دەپ ەسەپتەمەيمىن.
ءبىز ساياسي ديالوگتى قولدايمىز، ءارى سيرياداعى قاقتىعىستان شىعۋ جولدارىن ىزدەستىرۋ جونىندەگى كەلىسسوزدەردى ءالى دە جالعاسىتىرپ كەلەمىز».
ايتا كەتەيىك، رەسەي سيرياعا قازاقستاندىق جانە قىرعىزستان اسكەرىن جىبەرۋ تۋرالى كەلىسسوزدەردى جۇرگىزدى. بۇل تۋرالى قازاقستان جانە قىرعىزستان بيلىگىمەن كەلىسسوزدەر تۋراسىندا رەسەيدىڭ مەملەكەتتىك دۋما كوميتەتىنىڭ باسشىسى ۆلاديمير شامانوۆ ايتتى. تۇركيا پرەزيدەنتىنىڭ وكىلى دە سيرياعا قازاقستان مەن قىرعىزستان اسكەرىن كىرگىزۋ مۇمكىن ەكەنىن حابارلادى.
شولۋشى: گۇلىم جاقان
