وڭتۇستىك قازاقستان وبلىسىندا اناسى ءولىمشى ەتىپ ساباعان 7 جاسار اسىلعا كومەك قاجەت. سەبەبى، قاتتى سوققىنىڭ سالدارىنان بالانىڭ سول اياعى مەن قولىنىڭ قيمىلى قيىنداعان. دەر كەزىندە وڭالتۋ شارالارىن جاساماسا، مۇگەدەك بولىپ قالۋى مۇمكىن، دەپ حابارلايدى قامشى اقپاراتتق اگەنتتىگى قازاقپاراتقا سىلتەمە جاساپ.

ءوز اناسىنان جازىقسىز تاياق جەگەن اسىل ءالى كۇنگە وبلىستىق بالالار اۋرۋحاناسىندا ەم قابىلداۋدا. دارىگەرلەر ونى شىعارۋعا بولاتىنىن ايتادى. ءبىراق وزدىگىنەن ءجۇرىپ تۇرۋى ءۇشىن وڭالتۋ شارالارى قاجەت. ياعني ەلفك، ماسساج، نيەۆروپاتولوگتىڭ باقىلاۋى مەن كونسەرۆاتيۆتى ەم قاجەت ەكەن.

«ءقازىر اسىل قاجەتتى ەمدىك شارالارىن قابىلداۋدا. ءبىز قولدان كەلگەنىن جاساپ جاتىرمىز. دەسە دە وزدىگىنەن ءجۇرىپ تۇرۋى ءۇشىن، قولىنىڭ قيمىلىن جاقسارتۋ ءۇشىن وڭالتۋ ورتالىقتارىنا الىپ بارسا جاقسى بولار ەدى. الايدا ءبىز بالانى ونداي ورتالىقتارعا وزدىگىمىزدەن جىبەرە المايمىز. بۇل ماسەلەنى ورداباسى اۋداندىق ءبىلىم ءبولىمىنىڭ ماماندارى شەشۋى كەرەك»، - دەيدى وبلىستىق بالالار اۋرۋحاناسى باس دارىگەرىنىڭ ورىنباسارى بولات نۇسقابايەۆ.

ال، ورداباسى اۋداندىق ءبىلىم ءبولىمىنىڭ ماماندارى بولسا اسىلدىڭ جاعدايىنان حابار الىپ تۇرعانىن ايتتى. ءبولىمنىڭ ادىسكەرى باقبەرگەن سارسەنبەكوۆتىڭ سوزىنشە بالانى اۋرۋحانادان شىعارۋعا ءالى ەرتە ەكەن. دارىگەرلەر ونىڭ قاجەتتى ەمدەرىن تولىق قابىلداپ بىتپەگەن دەگەن حابار بەرىپتى.

«ءبىز اسىلدىڭ دەنساۋلىعى تۋرالى تۇراقتى تۇردە حابار الىپ تۇرمىز. ەگەر ونى شىعارۋعا بولادى دەسە بەيىمدەۋ ورتالىعىنا ورنالاستىرۋعا قۇجاتتار دايىندايمىز. ال، ازىرگە كەيبىر ازاماتتار وعان قولدان كەلگەنشە دەمەۋشىلىك جاساپ، ەمدەرىنە قولعابىس ەتىپ وتىر»، - دەيدى باقبەرگەن سارسەنبەكوۆ.