ومبى تۋماسى، الاش ارىسىنىڭ ۇرپاعى قايىربەك كەمەڭگەر دۇنيەجۇزى قازاقتارىنىڭ V قۇرىلتايىنا قاتىستى دەپ جازادى Qamshy.kz ءتىلشىسى.
اتا-باباسى قاسيەتتى باياناۋىلدان، تاعدىردىڭ تالكەگىمەن ومبى جەرىندە تۋىپ-وسكەن، الاش ارداقتىسى قوشكە كەمەڭگەر ۇلىنىڭ ۇرپاعى قايىربەك كەمەڭگەر دۇنيەجۇزى قازاقتارىنىڭ V قۇرىلتايىنا دەلەگات رەتىندە قاتىستى. قايىربەك كەمەڭگەر تەكتىنىڭ ۇرپاعى عانا ەمەس عالىم، فيلولوگيا عىلىمدارىنىڭ كانديداتى، ل.ن.گۋميلۆ اتىنداعى ەۇۋ قازاق ادەبيەتى كافەدراسىنىڭ دوسەنتى.
ومبى وبلىسىنىڭ شارباقكول اۋدانى جانان اۋىلىندا تۋىپ وسكەن قايىربەك 1988 جىلعا دەيىن «حالىق جاۋىنىڭ تۇقىمى» دەگەن قارا تاڭبا تاڭىلىپ كەلسە دە، اتاسى «كەمەڭگەر» تەگىن ساقتاعان.
تۋرا 100 جىل بۇرىن ەكىنشى جالپىقازاق سەزىنە دەلەگات بولعان قوشكە باباسىنداي قايىربەك تە ولەڭگە جاقىن، جۇرەك ءلۇپىلىن جىر ارقىلى ورنەكتەيدى. ورمانداي ورىس اراسىندا ءجۇرىپ، ورىس مەكتەبىن بىتىرسە دە، 2002 جىلى الماتىدا جازۋشى باسپاسىنان «اتامنىڭ اماناتى» اتتى جىر جيناعىن شىعارعان. سول كىتاپتا اتا جۇرتتىڭ ءقادىرىن، ەلگە دەگەن ساعىنىشىن، ومىرلىك ۇستانىمىن «اتامەكەنگە» اتتى ولەڭىندە ورنەكتەگەن.
الاشتانۋشى، قالامگەر قايىربەك كەمەڭگەردىڭ اتالعان ولەڭدەگى «قازاقستاندا تۋماسامداعى، قازاقستاندا ولەيىن دەپ ەم...» دەگەن جالىندى سوزدەرى - قۇرىلتايعا كوز تىككەن، الەمدە تارىداي شاشىراعان قازاقتىڭ «اتاجۇرتقا ساعىنىشى» ىسپەتتى.
اتامەكەنگە
ارمانىم اسقاق – استانام قايدا؟
جاتاتىن جەكە باسپانام قايدا؟
عىلىمي جۇمىس باستاعان قايدا؟
بىلمەيمىن، ءبارىن تاستاعام جايعا.
ارماننىڭ وتىن وشىرگەنىم بە؟
اۋىلىن الشاق كوشىرگەنىم بە؟
ءۇمىتتىڭ گۇلىن وسىرگەنىمدە،
تاعدىرىم، مەنى كەشىرمەدىڭ بە؟
ۇقپاي-اق قويدىڭ جايىن بالانىڭ،
وزىڭە ءبىراق ۋايىمدامادىم.
تۇسىنبەي تالاي مويىندامادىڭ
مەندە دە تالانت بويىمدا بارىن.
مەن ءۇشىن اق تاڭ اتار ەكەن بە؟
كوكشەنى كوپ جىل شاھار ەتەم بە؟
كەرەكسىز بولىپ جاتار ەكەم بە،
ورالعان كەزدە اتامەكەنگە؟
ومبىنى تاستاپ اق قايىڭمەنەن،
جۇرتىمنان جىراق جاتپايىن دەپ ەم.
سالتىمدى تازا ساقتايىن دەپ ەم،
ءۇمىتىن ەلدىڭ اقتايىن دەپ ەم،
ءجۇرىستى مىنا ماقتايىن نەمەن؟
مەرەيىم ءوسىپ مەرەيىڭمەنەن،
اتاجۇرت، ساعان كەلەيىن دەپ ەم.
بارىمدى ساعان بەرەيىن دەپ ەم،
ءبارىن دە سوسىن كورەيىن دەپ ەم.
قازاقستاندا تۋماسام داعى،
قازاقستاندا ولەيىن دەپ ەم.
قايىربەك كەمەڭگەر
2001
پىكىر قالدىرۋ